ٹالا ہاسی: (دنیا نیوز) ویسٹ انڈیز کیخلاف کھیلے گئے ٹی ٹوئنٹی میچ میں فاسٹ بولر حسن علی کی ایک بار پھر بدترین پرفارمنس رہی۔
فاسٹ بولر حسن علی میچ کے اہم موقع پر لائن اور لینتھ بھول گئے، بیٹرز نے خوب درگت بنائی، حسن علی نے 4 اوورز میں 48 رنز دے کر ویسٹ انڈیز کی فتح یقینی بنا دی، کوئی وکٹ بھی نہ لے سکے۔
ویسٹ انڈیز کے ٹیل اینڈرز نے گراؤنڈ کے چاروں اطراف چوکے اور چھکے لگائے۔
واضح رہے کہ ویسٹ انڈیز نے امریکی ریاست فلوریڈا میں کھیلے جانے والے دوسرے ٹی 20 میچ میں پاکستان کو شکست دے کر سیریز ایک ایک سے برابر کر دی۔
پاکستان اور ویسٹ انڈیز کے درمیان دوسرے ٹی ٹوئنٹی میچ میں قومی ٹیم نے ویسٹ انڈیز کو جیت کے لئے 134 رنز کا ہدف دیا تھا جسے سنسنی خیز مقابلے کے بعد کالی آندھی نے حاصل کر لیا، جیسن ہولڈر نے آخری اوور میں میچ کا پانسہ پلٹ دیا، آخری گیند پر 3 رنز درکار تھے، جیسن نے فتح کا چوکا مار کر میچ اپنے نام کر لیا تھا۔
