لاہور: (ویب ڈیسک) ایشیا کپ میں پاکستان اور بھارت کے ہائی وولٹیج میچ سے قبل دبئی پولیس نے کرکٹ شائقین کو سخت وارننگ جاری کر دی۔
پولیس حکام نے واضح کیا ہے کہ سٹیڈیم میں کسی قسم کا تشدد، بدزبانی یا نسل پرستانہ رویہ ہرگز برداشت نہیں کیا جائے گا۔
دبئی پولیس کے ایونٹس سکیورٹی کمیٹی کے چیئرمین میجر جنرل سیف محیر المزروعی کے مطابق تشدد یا بدزبانی کرنے والوں کو ایک سے تین ماہ قید اور 10 سے 30 ہزار درہم جرمانے کا سامنا کرنا پڑے گا جو پاکستانی کرنسی میں ساڑھے 7 لاکھ سے 23 لاکھ روپے بنتا ہے۔
دبئی پولیس نے شائقین کو مشورہ دیا ہے کہ وہ کھیل کے دوران مثبت اور مہذب رویہ اپنائیں۔
پولیس حکام کے مطابق خلاف ورزی کرنے والوں کے خلاف فوری قانونی کارروائی ہوگی تاکہ سٹیڈیم کے ماحول اور شائقین کی حفاظت یقینی بنائی جا سکے۔
