دبئی: (دنیا نیوز) ایشیا کپ کی تاریخ کے سب سے بڑے ٹاکرے میں پاکستان اور بھارت کی ٹیمیں کل فائنل میں مدمقابل آئیں گی۔
بھارتی ٹیم رواں ایونٹ میں اب تک ناقابل شکست ہے اور پاکستان ٹیم کو بھی گروپ اور سپر فور مرحلے میں شکست دے چکی ہے، تاہم فائنل میں بھارتی ٹیم کے 3 اہم کھلاڑیوں ابھیشیک شرما، تلک ورما اور آل راؤنڈر ہاردک پانڈیا کی شرکت مشکوک ہے۔
بھارت کے بولنگ کوچ نے پانڈیا، تلک ورما اور ابھیشیک شرما کی فٹنس پر شدید خدشات کا اظہار کیا ہے۔
بھارتی بولر ہاردک پانڈیا سری لنکا کے خلاف پہلا اوور کرانے کے بعد ہیمسٹرنگ کا شکار ہوکر میدان سے باہر چلے گئے تھے اور پھر پورے میچ میں واپس نہیں آئے۔
دوسری جانب ابھیشک شرما بھی سری لنکا کے خلاف میچ میں کافی وقت میدان سے باہر رہے تھے، بولنگ کوچ کا کہنا تھا کہ ہاردک پانڈیا، تلک ورما اور ابھیشیک شرما کی انجری کا جائزہ آج رات اور کل صبح لیا جائے گا۔
