دہلی: (ویب ڈیسک) بھارت نے ایشیا کپ کے بعد انٹرنیشنل کرکٹ کونسل (آئی سی سی) ویمنز ورلڈ کپ کو بھی سیاست زدہ کرنے کا منصوبہ بنا لیا۔
بھارتی صحافی بوریا مجمدار نے سوشل میڈیا پر لکھا ہے کہ ایشیا کپ میں شروع ہونے والا سلسلہ ویمنز ورلڈ کپ میں بھی جاری رہے گا۔
انہوں نے کہا ہے کہ ویمنز ورلڈ کپ میں جو چیز تبدیل ہو گی وہ صرف جنس ہو گی، یعنی مردوں کے بعد اب خواتین کے مقابلے میں بھی وہی سلسلہ چلے گا، ویمنز ورلڈ کپ میں پاک بھارت میچ میں بھی وہی ہوگا جو ایشیا کپ میں ہوا۔
بوریا مجمدار نے اپنے بیان میں دعویٰ کیا کہ ویمنز ورلڈ کپ میں پاک بھارت میچ کے موقع پر کھلاڑی ہاتھ نہیں ملائیں گے۔
یاد رہے کہ بھارت نے حال ہی میں ہونے والے ایشیا کپ کو بھی سیاست زدہ کرنے کی کوشش کی، بھارتی کھلاڑیوں نے کسی بھی میچ کے دوران پاکستانی کھلاڑیوں سے ہاتھ نہیں ملائے تھے اور پھر ایشیا کپ کا فائنل جیتنے کے بعد بھارتی کپتان نے ایشین کرکٹ کونسل کے چیئرمین محسن نقوی سے ٹرافی بھی وصول نہیں کی تھی۔
واضح رہے کہ ویمنز ورلڈ کپ میں پاکستان اور بھارت کا میچ 5 اکتوبر کو کھیلا جائے گا اور پاکستان ہائبرڈ ماڈل کے تحت اپنے سارے میچز سری لنکا میں کھیلے گا۔
