اسلام آباد: (دنیا نیوز) پاکستان اور عمان کے درمیان صحت کے شعبے میں تعاون بڑھانے پر اتفاق ہوگیا۔
وفاقی وزیر صحت مصطفیٰ کمال سے سلطنت عمان کے سفیر فہد خلف الخروصی نے ملاقات کی، اس دوران صحت کے شعبے سمیت دو طرفہ تعاون اور باہنی دلچسپی کے امور پر تبادلہ خیال کیا گیا۔
ملاقات میں وفاقی وزیر مصطفیٰ کمال نے کہا کہ پاکستان اور عمان کے مابین مضبوط برادرانہ تعلقات ہیں، انہوں نے صحت کے شعبے میں جاری اصلاحات اور ویکسین کی مقامی طور پر تیاری کے بارے حکومتی اقدامات سے آگاہ کیا اور ساتھ ہی صحت کے مختلف شعبوں میں مل کر کام کرنے پر اتفاق کیا۔
وزیر صحت نے کہا کہ فارماسیوٹیکل شعبے میں تکنیکی اشتراک سے ایک دوسرے سے استفادہ حاصل کر سکتے ہیں، پاکستان ویکسین کی مقامی تیاری کیلیے پُرعزم ہے، ہیلتھ کیئر سٹاف اور میڈیکل فزیشنز کے شعبے ایک دوسرے کے تجربات سے مستفید ہو سکتے ہیں۔
اس موقع پر عمان کے سفیر فہد خلف الخروصی نے پاکستان کے طبی شعبے کی مہارت کو قابل تحسین قرار دیتے ہوئے کہا کہ سلطنت عمان نرسنگ اور میڈیکل سپیشلسٹس سمیت ہنر مند طبی عملے کی خدمات حاصل کرنے میں دلچسپی رکھتی ہے۔
انہوں نے طبی تعلیم، پیشہ ورانہ تربیت اور ماہرین کے باقاعدہ تبادلے کی اہمیت پر زور دیا۔
اس پر وزیر صحت مصطفیٰ کمال نے کہا کہ اس سے دونوں ممالک کے صحت کے میدان میں اشتراکِ عمل کو مزید مستحکم کرنے میں مدد ملے گی۔
