میلبرن: (دنیا نیوز) آسٹریلوی آل راؤنڈر گلین میکسویل نیوزی لینڈ کے خلاف ٹی 20 سیریز سے باہر ہو گئے۔
گلین میکسویل کو پریکٹس سیشن کے دوران بولنگ کرتے ہوئے ساتھی کھلاڑی مچل اوون کی شاٹ کلائی پر لگی جس کی وجہ سے وہ زخمی ہو گئے۔
اس حوالے سے کرکٹ آسٹریلیا کا کہنا ہے کہ آل راؤنڈر گلین میکسویل کو فریکچر کا سامنا ہے، میکسویل کی جگہ جوش فلپ کو ٹیم میں شامل کر لیا گیا ہے، آسٹریلیا اور نیوزی لینڈ کے درمیان پہلا ٹی ٹوئنٹی میچ کل ماؤنٹ مونگانوئی میں کھیلا جائے گا۔
نیوزی لینڈ کے راچن راویندرا بھی زخمی
دوسری جانب بے اوول کے مقام پر پریکٹس سیشن کے دوران نیوزی لینڈ کے راچن راویندرا کے چہرے پر چوٹ لگ گئی، راچن باؤنڈری لائن پر کیچ پریکٹس کے دوران باؤنڈری ہورڈنگ سے ٹکرا گئے۔
نیوزی لینڈ کرکٹ کا بتانا ہے کہ راچن نے ابتدائی کنکشن ٹیسٹ پاس کرلیا ہے تاہم وہ میڈیکل ٹیم کی نگرانی میں رہیں گے، راچن راویندرا آسٹریلیا کے خلاف ہوم ٹی 20 سیریز کے لیے نیوزی لینڈ اسکواڈ کا حصہ ہیں۔
