لاہور: (دنیا نیوز) پاکستان کی جنوبی افریقہ کے خلاف پہلے ٹیسٹ میچ میں بیٹنگ جاری ہے، کھانے کے وقفے تک قومی ٹیم نے ایک وکٹ کے نقصان پر 107 رنز بنا لئے ہیں۔
قذافی سٹیڈیم لاہور میں کھیلے جا رہے پہلے ٹیسٹ میچ کے پہلے سیشن میں پاکستان کی پہلی وکٹ تیسری ہی گیند پر گر گئی، اوپنر عبداللہ شفیق 2 رنز بنا کر پویلین لوٹ گئے، پاکستانی اوپنر عبداللہ شفیق کو ربادا نے ایل بی ڈبلیو پر آؤٹ کیا۔
عبداللہ شفیق کے آؤٹ ہونے کے بعد شان مسعود اور امام الحق نے ذمہ دارانہ بیٹنگ کرتے ہوئے ٹیم کا سکور آگے بڑھایا اور کھانے کے وقفے تک امام الحق 59 جبکہ شان مسعود 44 رنز کے ساتھ وکٹ پر موجود ہیں۔
قبل ازیں ٹاس کے بعد گفتگو کرتے ہوئے قومی ٹیم کے کپتان شان مسعود نے کہا کہ سٹیڈیم نیا بنا ہے معلوم نہیں یہاں ٹیسٹ میچ کیسا ہوگا، ورلڈ چیمپئن جنوبی افریقہ کیخلاف کھیلنا ایک بہترین موقع ہے، ہمارے پاس 2 سپنرز ہیں جو طویل اوورز کراسکتے ہیں۔
جنوبی افریقی کپتان کا کہنا تھا کہ 2 اہم پلیئرز نہیں کھیل رہے جن کی کمی محسوس ہوگی، ہم ایسی کنڈیشنز میں کرکٹ کھیل چکے ہیں۔
پہلے ٹیسٹ میچ میں 38 سالہ آصف آفریدی ڈیبیو نہیں کر سکے، ساجد خان وائرل فیور سے صحتیاب ہو کر ٹیم میں شامل ہوگئے۔
پاکستانی سکواڈ
شان مسعود (کپتان)، عبداللہ شفیق، امام الحق، بابر اعظم، سعود شکیل، محمد رضوان (وکٹ کیپر)، سلمان علی آغا، شاہین شاہ آفریدی، حسن علی، نعمان علی اور ساجد خان قومی ٹیم میں شامل ہیں۔
— Pakistan Cricket (@TheRealPCB) October 12, 2025
جنوبی افریقن سکواڈ
ٹونی ڈی زورزی، ریان رکلٹن، ویان مولڈر، ایڈن مارکرام (کپتان)، ٹرسٹان اسٹبس، ڈیوالڈ بریوس، کائل ویرین، سین متھوسمی، پرینلان سبرائین، کگیسو ربادا، سائمن ہارمر جنوبی افریقی سکواڈ کا حصہ ہیں۔
— Proteas Men (@ProteasMenCSA) October 12, 2025
