مظفر گڑھ: انسانیت سوز واقعہ، رشتے سے انکار پر لڑکی کو آگ لگا دی گئی

Last Updated On 10 May,2019 03:35 pm

مظفر گڑھ: (دنیانیوز) مظفر گڑھ میں سفاک ملزم نے رشتہ سے انکار پر لڑکی کو پٹرول ڈال کر آگ لگا دی، لڑکی تشویشناک حالت میں ہسپتال منتقل، تھانہ بیٹ میر ہزار خان پولیس نے اقدام قتل کا مقدمہ درج کرلیا۔

مظفر گڑھ کے علاقے بیٹ میر ہزار خان کی بستی میانی میں ظلم اور سفاکیت کی انتہا کا واقعہ پیش آیا، جس میں سفاک ملزم نے رشتہ سے انکار پر گھر داخل ہو کر لڑکی پر پٹرول ڈال کر آگ لگا دی، آگ لگنے کے باعث لڑکی مصباح کا منہ، جسم اور بازو بری طرح جھلس گیا، ملزم یوسف نے لڑکی کو آگ لگانے کے بعد گھر میں جان سے مارنے کی دھمکی آمیز خط بھی پھینکا ہے جو پولیس کے حوالے کر دیا گیا۔

آگ سے بری طرح جھلسنے والی 16 سالہ لڑکی مصباح کو تشویشناک حالت میں برن یونٹ منتقل کر دیا گیا جبکہ تھانہ بیٹ میر ہزار خان پولیس نے ملزم یوسف اور اسکے نامعلوم ساتھی کے خلاف اقدام قتل کی دفعات کے تحت مقدمہ درج کرلیا ہے۔