فیصل آباد: (دنیا نیوز) فیڈرل بورڈ آف ریونیو (ایف بی آر) نے فیصل آباد میں کارروائی کرتے ہوئے 30 لاکھ غیر قانونی اور بغیر ڈیوٹی ادا کئے سگریٹ ضبط کرلیے ہیں۔
فیڈرل بورڈ آف ریونیو کے ذرائع کے مطابق انٹیلی جنس اینڈ انوسٹی گیشن (اِن لینڈ ریونیو)، فیصل آباد کی بغیر ڈیوٹی سگریٹ کا کاروبار کرنے والوں کے خلاف کارروائی کی۔
ڈائریکٹریٹ انٹیلی جنس اینڈ انوسٹی گیشن آئی آر فیصل آباد نے ایف بی آر ہیڈ کوارٹر اور ڈائیریکٹر جنرل انٹیلی جنس اینڈ انوسٹی گیشن کی ہدایات کی روشنی میں شعبہ ٹوبیکو میں ٹیکس چوری کے خلاف کارروائیاں تیز کرتے ہوئے نے حالیہ دنوں کے دوران فیصل آباد کے کئی مقامات سے مختلف برانڈز کے بغیر ڈیوٹی سگریٹ کے 300 کارٹن (تیس لاکھ سگریٹ) برآمد کر لئے۔
انٹیلی جنس اینڈ انوسٹی گیشن (اِن لینڈ ریونیو)، فیصل آباد کے ٹوبیکو سکواڈ نے ڈپٹی ڈائریکٹر عمران ظفر کی نگرانی میں سیلز ٹیکس ایکٹ، 1990، کے سیکشن 38 کے تحت اپنے اختیارات کا استعمال کرتے ہوئے ایک رجسٹرڈ شخص کے احاطہ کاروبار / سیلز آفس/ گودام واقع لاری اڈہ ،تاندلیا نوالہ کا دورہ کیا جہاں سے 150 کارٹن جعلی/بغیر ڈیوٹی سگریٹ برآمد کر لئے گئے۔
مالک سے جب سیلز ٹیکس انوائس/ بل ٹی اور دیگر دستاویزات کا تقاضا کیا گیا تو وہ ان میں سے کوئی بھی دستاویز پیش کرنے میں ناکام رہا اور اس بناء پر بغیر ڈیوٹی سگریٹ کے 150 کارٹن تحویل میں لے لئے گئے۔
ایک اور کارروائی کے دوران انٹیلی جنس اینڈ انوسٹی گیشن (اِن لینڈ ریونیو)، فیصل آباد کے ٹوبیکو سکواڈ نے اطلاع پر ڈپٹی والا انٹرچینج، ایم تھری موٹروے، فیصل آباد پر چھاپہ مارا اور انٹرچینج سے تقریباً نصف کلومیٹر کے فاصلے پر بنائے گئے ایک عارضی شیڈ سے 150 کارٹن بغیر ڈیوٹی سگریٹ برآمد کر لئے۔ موقع پر دو افراد موجود تھے جو سیلز ٹیکس انوائس یا بل ٹی وغیرہ جیسی کوئی بھی دستاویز پیش کرنے میں ناکام رہے جس پر یہ سگریٹ تحویل میں لے لئے گئے۔ چوری شدہ ٹیکسز اور ڈیوٹیز کی مالیت کئی لاکھ روپے بنتی ہے۔
ڈائریکٹر ڈائریکٹوریٹ آف انٹیلی جنس اینڈ انوسٹی گیشن (ان لینڈ ریونیو)، فیصل آباد کی جانب سے یہ کارروائیاں بغیر ڈیوٹی/ جعلی سگریٹ کی غیرقانونی تجارت کی روک تھام کے سلسلے میں چلائی گئی مہم کے تحت کی جا رہی ہیں۔
