لاہور: (محمد اشفاق) لاہور ہائیکورٹ میں پیشی پر آئے سائل نے احاطہ عدالت میں اچانک خود کو آگ لگا لی۔
رپورٹ کے مطابق آصف جاوید نامی شحص کا کیس لاہور ہائی کورٹ کے جج جسٹس شجاعت علی خان کی عدالت میں زیر سماعت تھا، آصف نامی شحص کا تعلق خانیوال سے بتایا جارہا ہے، آصف کو فوری ریسکیو کرکے کے قریبی ہسپتال منتقل کر دیا گیا۔
خود سوزی کی کوشش کو ناکام بنانے والے پولیس اہلکار کا کہنا تھا کہ سائل پانی کی بوتل میں پیٹرول لایا عدالتی راہداری سے نکلتے ہی اچانک لیٹر جلا کر خود کو آگ لگا دی، موقع پر موجود پولیس اہلکار نے آگ بجھا کر خود سوزی کرنے والے شخص آصف جاوید کو ہسپتال منتقل کر دیا۔
خود سوزی کرنے والے شحض آصف جاوید کی اہلیہ زونیرہ بی بی نے دنیا نیوز کو بتایا کہ ان کے 6بچے ہیں کیس کی وجہ سے گھر اور گاڑی فروخت ہوگئی ہے، گزر بسر ادھار مانگ کر چل رہا ہے اور اب آصف کا علاج بھی مفت نہیں ہورہا، اعلی حکام سے اپیل ہے کی ہماری مدد کیجائے ۔
یہ بھی پڑھیں: لاہور ہائیکورٹ میں سائل کا آگ لگانے کا واقعہ، ایس پی سکیورٹی تبدیل، ڈی ایس پی معطل
چیف جسٹس لاہور ہائیکورٹ جسٹس عالیہ نیلم نے واقع کا سخت نوٹس لیا تو پولیس افسران کی دوڑیں لگ گئیں، آئی جی پنجاب اور ڈی آئی جی آپریشن نے فوری ہائیکورٹ کا دورہ کرکے سکیورٹی انتظامات کا جائزہ لیا۔
چیف جسٹس لاہور ہائیکورٹ جسٹس مس عالیہ نیلم کے سخت نوٹس پر آئی جی پنجاب نے ایس پی سکیورٹی ہائیکورٹ خرم شہزاد کو تبدیل اور ڈی ایس پی سکیورٹی خالد ملک کو معطل کردیا ۔
چیف جسٹس عالیہ نیلم نے ایڈیشنل رجسٹرار سکیورٹی سے بھی وضاحت طلب کرتے ہوئے قرار دیاکہ سکیورٹی کے اقدمات پر غفلت برداشت نہیں کی جائے گی۔
کیس کا بیک گراؤنڈ
خود سوزی کی کوشش کرنے والا آصف جاوید خانیوال کا رہائشی ہے، آصف جاوید کو نجی کمپنی نے 2016 کو برطرف کیا، 2019 میں لیبر کورٹ نے سائل کی برطرفی کا فیصلہ کالعدم قرار دے کر نوکری پر بحال کرنے کا حکم دیا،نجی کمپنی نے لیبر کورٹ کا فیصلہ نیشنل انڈسٹریل ریلیشن کمیشن میں چیلنج کیا۔
23 نومبر 2020 کو نیشنل انڈسٹریل ریلیشن کمیشن نے نجی کمپنی کی اپیل خارج کردی، نجی کمپنی نے دسمبر 2020 میں لاہور ہائیکورٹ میں فیصلے کو چیلنج کیا جو ابھی تک جسٹس شجاعت علی خان کی عدالت میں زیر التوا ہے اور اب اس کیس میں اصف جاوید نے نیا وکیل پیش کیا جس پر عدالت نے سماعت 8 اپریل تک ملتوی کر دی۔
