پشاور:(دنیا نیوز) ایف آئی اے این سی بی انٹرپول نے 11 سال سے قتل کے مقدمے میں مطلوب خطرناک اشتہاری کو عمان سے گرفتار کرلیا۔
ایف آئی اے ترجمان کے مطابق اشتہاری شاہد خان نے ایک دہائی قبل قتل کیا اور عمان فرار ہو گیا تھا جسے انٹرپول کے ذریعے گرفتار کرکے پشاور ایئرپورٹ منتقل کر دیا گیا۔
ترجمان نے بتایا گرفتار ملزم کے پی پولیس کو مطلوب اور اس کے خلاف سال 2014 میں قتل کی دفعات کے تحت بنوں میں مقدمہ درج تھا، ایف آئی اے این سی بی انٹرپول نے ملزم کی گرفتاری کے لئے ریڈ نوٹس جاری کیا تھا۔
ایف آئی اے ترجمان کا کہنا تھا ملزم کو بعد ازاں ایف آئی اے امیگریشن پشاور نے کے پی پولیس حکام کے حوالے کر دیا، شاہد خان کی حوالگی انٹرپول اسلام آباد کی انٹرپول مسقط کے ساتھ قریبی رابطہ کاری کی وجہ سے ممکن ہوئی اور جدید ٹیکنالوجی سے آراستہ این سی بی انٹرپول 24/7 پوری دنیا کے ساتھ رابطے میں ہے۔
ترجمان نے مزید بتایا کہ ملزمان کی گرفتاری کے لئے تمام تر وسائل کو بروئے کار لایا جا رہا ہے۔
