گوجرانوالہ: (دنیا نیوز) وفاقی تحقیقاتی ایجنسی (ایف آئی اے) نے کارروائی کرتے ہوئے 3 اشتہاریوں سمیت 6 انسانی سمگلرز کو گرفتار کرلیا۔
ایف آئی اے حکام کے مطابق گرفتار ملزمان کی شناخت محمد عارف حسین، ابرار علی، امتیاز علی، محمد ایان بٹ ، آصف رضا ، ذکا اللہ عرف احسان اللہ سیفی کے ناموں سے ہوئی ہے، ملزمان کو جہلم، ڈسکہ، سیالکوٹ، شیخوپورہ اور گوجرانوالہ سے گرفتار کیا گیا۔
ترجمان ایف آئی اے نے بتایا کہ ملزم ابرار علی نے 6 شہریوں کو یورپ بھجوانے کا جھانسہ دے کر 2 کروڑ روپے سے زائد رقم وصول کی، ملزم نے شہریوں کو وزٹ ویزے پر موریطانیہ بھجوایا اور موریطانیہ سے کشتی کے ذریعے یورپ بھجوانے کی کوشش کی ، شہریوں نےغیر قانونی طور کشتی کے ذریعے یورپ جانے سے انکار کر دیا اور واپس آ گئے۔
ملزم آصف رضا سال 2022 سے اشتہاری ہے ، ملزم نے شہریوں کو یورپ بھجوانے کے لیے ایک کروڑ 35 لاکھ روپے سے زائد بٹورے، ملزم نے شہریوں کو یورپ کی بجائے آذربائیجان بھجوا دیا ، آذربائیجان میں مقیم ملزم کے ساتھیوں نے شہریوں کو محصور کر لیا اور تشدد کا نشانہ بنایا، ملزمان شہریوں سے تاوان کا مطالبہ بھی کرتے رہے ، شہری ایک ماہ کے بعد جان بچا کر واپس آ گئے۔
ملزم امتیاز نے شہری کو اٹلی ملازمت کی غرض سے بھجوانے کے لیے 8 لاکھ روپے وصول کیے ، ملزم آیان بٹ نے شہری کو یو کے بھجوانے کے لیے 60 لاکھ روپے سے زائد کی رقم وصول کی ، ملزم عارف حسین اور ذکاء اللہ سال 2012 سے انسانی سمگلنگ کے مقدمے میں اشتہاری تھے۔
ملزم عارف حسین نے شہری کو بیرون ملک ملازمت کی غرض سے بھجوانے کے لیے ایک لاکھ 75 ہزار روپے سے زائد کی رقم وصول کی ، ملزم ذکاء اللہ شہریوں کو غیر قانونی طور پر بیرون ملک بھجوانے میں ملوث پایا گیا ، ملزم نے سال 2012 میں شہری کو دبئی ملازمت کی غرض سے بھجوانے کے لیے ایک لاکھ 80 ہزار روپے وصول کیے۔
ایف آئی اے کی جانب سے مزید بتایا گیا کہ ملزمان شہریوں کو بیرون ملک بھجوانے میں ناکام رہے اور روپوش ہو گئے ، ملزمان کو گرفتار کر کے تفتیش کا آغاز کر دیا گیا ہے ، ملزمان کے دیگر ساتھیوں کے خلاف چھاپہ مار کارروائیاں جاری ہیں۔
