گوجرانوالہ: (دنیا نیوز) فیڈرل انویسٹی گیشن ایجنسی (ایف آئی اے) نے مراکش کشتی حادثے میں ملوث انسانی سمگلر سمیت 3 ایجنٹ گرفتار کر لئے۔
ترجمان کے مطابق ایف آئی اے گوجرانوالہ زون نے مختلف علاقوں میں کارروائی کر کے مراکش کشتی حادثے میں ملوث انسانی سمگلر سمیت 3 ایجنٹ گرفتار کئے، ملزمان کی شناخت مرزا احسان بیگ، عمران مشتاق اور حسن عباس کے نام سے ہوئی ہے۔
ملزمان نے ایجنٹوں کے ساتھ ملکر شہری کو سپین بھجوانے کی کوشش کی، ملزمان نے شہری سے اس مقصد کیلئے 27 لاکھ روپے ہتھیائے۔
ڈائریکٹر ایف آئی اے گوجرانوالہ زون عبدالقادر قمر کا کہنا ہے کہ ملزم کیخلاف مقدمہ درج کر کے تفتیش کا آغاز کر دیا گیا، ملزم کی نشاندہی پر مزید گرفتاریاں متوقع ہیں، کشتی حادثات میں ملوث عناصر کے خلاف کریک ڈاؤن جاری ہے۔
عبدالقادر قمر نے مزید کہا کہ انسانی سمگلنگ کے نیٹ ورک کے خلاف کارروائیاں مزید تیز کر دی گئی ہیں۔
