ایف آئی اے نے 3 ماہ میں 7 انتہائی مطلوب سمیت 330 انسانی سمگلرز دھر لیے

Published On 15 March,2025 10:22 am

گوجرانوالہ: (دنیا نیوز) ایف آئی اے گوجرانوالہ زون نے 3 ماہ کے دوران ریڈ بک کے 7 انتہائی مطلوب سمیت 330 انسانی سمگلرز کو گرفتار کرلیا۔

ایف آئی اے گوجرانوالہ زون کی 3 ماہ کی کارکردگی رپورٹ کے مطابق گزشتہ 3 ماہ کے دوران لیبیا کشتی حادثہ 2023 کے 9 اشتہاری انسانی سمگلروں کو بھی گرفتار کیا گیا، یونان کشتی حادثہ 2024 میں ملوث 18 انسانی سمگلرز بھی گرفتار ہوئے۔

رپورٹ میں بتایا گیا کہ مراکش کشتی حادثے 2025 میں ملوث 11 ملزمان بھی ایف آئی اے کی گرفت میں آگئے، انسانی سمگلنگ میں ملوث ملزمان کی 53 کروڑ روپے سے زائد مالیت کی جائیدادیں ضبط کیں۔

حکام کے مطابق انسانی سمگلنگ میں ملوث عناصر کے زیر استعمال 5 کروڑ 29 لاکھ روپے کے بینک اکاؤنٹس منجمد کیے گئے، انٹرپول کے ذریعے انسانی سمگلنگ میں ملوث ملزمان کی گرفتاری کے لئے مجموعی طور پر 31 ریڈ نوٹسز جاری کیے گئے تھے۔