لاہور: (دنیا نیوز) جیلوں میں ملاقات کے لئے ایڈوانس بکنگ کلچر متعارف کروانے کا فیصلہ، جیلوں میں قید اپنے پیاروں سے ملاقات کے لئے گھنٹوں انتظار نہیں کرنا پڑے گا۔
آئی جی جیل میاں فاروق نذیر نے کہا کہ ملاقاتی آن لائن ملاقات کے لئے ٹائم حاصل کریں گے، ملاقاتی کو دیئے گئے وقت پر قیدی کو بلا کرملاقات شیڈ میں ملاقات کروائی جائےگی۔
میاں فاروق نذیر نے کہا کہ شہری ویب سائٹ اور واٹس ایپ نمبر پر اپنے کوائف بھجوا کر ملاقات کا وقت حاصل کرسکیں گے، قیدیوں سے ملاقات کے لئے گزشتہ سال کیمپ جیل میں پائلٹ پراجیکٹ کے طور پر ایڈوانس بکنگ شروع کی گئی ہے۔
آئی جی جیل کے مطابق پائلٹ پراجیکٹ کی کامیابی کے بعد لاہور کی سینٹرل جیل سمیت پنجاب کی تمام جیلوں میں اپریل سے آغاز کیا جائے گا۔
جیل حکام کے مطابق آئی جی جیل نے کیمپ جیل میں ایڈوانس بکنگ کے فروغ کے لئے شہریوں کو آگاہی اور فوائد سے آگاہ کرنے کا حکم دیا تھا۔
میاں فاروق نذیر نے کہا کہ کیمپ جیل میں ایڈوانس بکنگ کے بعد روزانہ سیکڑوں شہری ایڈوانس بکنگ کے تحت ملاقاتیں کر رہے ہیں، ایڈوانس بکنگ سے جیلوں کی انتظار گاہ میں زیادہ رش نہیں رہے گا۔
آئی جی جیل نے کہا کہ پنجاب بھر کی جیلوں میں ویڈیو کال کی سہولت فراہمی کے لئے کافی حد تک ملاقاتوں میں کمی آئی ہے۔
