کراچی: (دنیا نیوز) شہر قائد کے علاقے ملیر سٹی غازی گوٹھ میں صندوق سے ایک خاتون کی لاش ملی جسے تشدد کا نشانہ بنانے کے بعد گلا گھونٹ کر قتل کیا گیا تھا۔
ترجمان کراچی پولیس کے مطابق ملیر سٹی کے علاقے ملیر غازی گوٹھ شیل پٹرول پمپ والی گلی میں ایک صندوق سے 60 سالہ خاتون کی لاش ملی۔
اطلاع ملنے پر پولیس موقع پر پہنچ گئی، جائے وقوعہ پر کرائم سین یونٹ کو موقع پر طلب کیا گیا جہاں سے شواہد اکھٹے کیے گئے بعدازاں جاں بحق ہونے والی خاتون کی لاش ایدھی ایمبولینس کے ذریعے جناح ہسپتال منتقل کر دی گئی۔
پولیس کا کہنا ہے کہ جاں بحق ہونے والی خاتون کی لاش 2 روز پرانی لگتی ہے، خاتون کے جسم پر تشدد کے نشانات ہیں، خاتون کو گلا گھونٹ کر قتل گیا، خاتون کا پوسٹ مارٹم کرایا جائے گا جس کے بعد مزید تفصیلات ملیں گی۔
جاں بحق ہونے والی خاتون کی فوری طور پر شناخت نہیں کی جا سکی، پولیس نے ضابطے کی کارروائی کے بعد لاش شناخت ورثا کے لیے سردخانے منتقل کر دی۔
