کراچی: (دنیا نیوز) سندھ رینجرز اور سی ٹی ڈی نے خفیہ اطلاع پر کارروائی کرتے ہوئے فتنہ الخوارج کے 3 انتہائی مطلوب دہشت گرد گرفتار کر لیے۔
ترجمان سندھ رینجرز نے بتایا ہے کہ کورنگی کے علاقے مہران ٹاؤن سے نعمت اللہ عرف عابد، محمد نور عرف مانی اور صابر اللہ عرف دانیال کو گرفتار کیا گیا، ملزمان سے اسلحہ اور دھماکہ خیز مواد بھی ملا ہے۔
ملزمان کا تعلق فتنہ الخوارج کمانڈر رومان رئیس اور اسلام دین گروپ سے ہے، ملزمان عسکری تربیت یافتہ ہیں، ملزمان کو فتنہ الخوارج کے کمانڈر نے بھتا وصولی، ٹارگٹ کلنگ اور دہشت گردی کے لیےکراچی بھیجا تھا۔
ملزم نعمت اللہ نے فتنہ الخوارج کا انتہائی سرگرم رکن ہونے کا اعتراف کیا ہے، ملزم 2018 میں فتنہ الخوارج مفتی نور ولی گروپ میں شامل ہوا، افغانستان سے عسکری تربیت حاصل کی اور خیبر پختونخوا میں دہشت گردی میں ملوث رہا، 2019 میں جیل بھی جا چکا ہے۔
گرفتار ملزم نور محمد 2022 میں فتنہ الخوارج اسلام الدین کے گروپ میں شامل ہوا، ملزم نور محمد بھتا وصولی، ٹارگٹ کلنگ اور دہشت گردی کے لیے منصوبہ بندی کر رہا تھا جبکہ ملزم نور محمد نے اکثر اہم مقامات کی ریکی بھی کر رکھی تھی۔
