لاہور: (دنیا نیوز) لاہور کے علاقے ڈیفنس اے میں خاتون کو کار سواروں نے اغوا کرلیا جبکہ اغوا کے واقعہ کی سی سی ٹی وی فوٹیج بھی سامنے آگئی۔
فوٹیج میں دو ملزمان کو ایک خاتون کو زبردستی پکڑ کر کار میں ڈالتے ہوئے دیکھا جاسکتا ہے، ملزمان خاتون کو اغوا کرکے موقع سے فرار ہوگئے۔
ایس ایچ او ڈیفنس اے خرم شہزاد کے مطابق اغوا کا مقدمہ خاتون کے بھائی امین کے بیان پر درج کرلیا گیا ہے، ایف آئی آر میں ایوب اور ایک نامعلوم ملزم کو بھی نامزد کیا گیا۔
مقدمہ مدعی کے مطابق اس کی بہن کو سابق بہنوئی فیاض نے اپنے ساتھیوں کے ساتھ مل کر اغوا کیا، مدعی کے مطابق خاتون کو چھ ماہ قبل طلاق ہو گئی تھی۔
ایس پی کینٹ ڈویژن قاضی علی رضا کے مطابق اغوا کاروں کی گرفتاری کے لیے چھاپوں کا سلسلہ جاری ہے، جلد ہی مغویہ کو بازیاب کروا لیا جائے گا۔
ایس ایچ او ڈیفنس اے خرم شہزاد کے ہمراہ ایک ٹیم تشکیل دی گئی ہے جو فوٹیج اور دیگر شواہد کی روشنی میں مغویہ کی بازیابی کے لیے کوشش کر رہی ہے، جلد ملزمان قانون کی گرفت میں ہوں گے۔
