اے این ایف نے 76 کلو گرام منشیات برآمد کر کے 7 ملزمان پکڑ لئے

کراچی: (دنیا نیوز) اینٹی نارکوٹکس فورس (اے این ایف) کا ملک کے مختلف شہروں میں منشیات سمگلنگ کے خلاف کریک ڈاؤن جاری ہے۔

ترجمان اے این ایف کے مطابق 9 مختلف کاروائیوں کے دوران 75 لاکھ 61 ہزارروپے سے زائد مالیت کی 76.283 کلو گرام منشیات برآمد کر کے 7 ملزمان گرفتار کر لئے گئے۔

حکام کا کہنا ہے کہ باچا خان انٹرنیشنل ایئرپورٹ پر قطر جانے والے مسافر کے بیگ سے 773 گرام آئس پکڑی گئی، لاہور میں واقع کوریئر آفس سے آسٹریلیا جانے والے پارسل سے 2.2 ِکلو آئس برآمد ہوئی، جبکہ علامہ اقبال انٹرنیشنل ایئرپورٹ کے کارگو شیڈ سے امریکا بھیجے جانے والے پارسل سے 210 گرام افیون قبضے میں لی گئی۔

جامشورو ٹول پلازہ کے قریب پشاور سے کراچی بھیجے جانے والے کارگو سے مشینری سپیئرپارٹس میں چھپائی گئی 36 کلو چرس برآمد ہوئی، شیخوپورہ موٹروے ٹول پلازہ کے قریب گاڑی سے 6 کلوافیون اور 24 کلو چرس پکڑ کر 2 ملزمان کو گرفتار کر لیا گیا۔

اس کے علاوہ آر سی روڈ حب کے قریب گاڑی سے 2.4 کلو آئس برآمد کر کے ملزم کو حراست میں لے لیا گیا، جبکہ لاہور میں شالیمار گارڈن کے قریب ملزم کے قبضے سے 3 کلو چرس اور 400 گرام آئس برآمد کی گئی۔

اسلام آباد موٹروے ٹول پلازہ کے قریب بس میں سوار مسافر کے قبضے سے 1.2 کلوچرس برآمد کر کے ملزم کو گرفتار کر لیا گیا، قراقرم یونیورسٹی روڈ گلگت کے قریب موٹر سائیکل سوار سے 100 گرام چرس پکڑ کر ملزم کو زیر حراست لیا گیا۔

ترجمان کے مطابق گرفتار ملزمان کے خلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔