لاہور، ڈیرہ غازی خان: (دنیا نیوز) پنجاب پولیس کو ٹارگٹ کلنگ، سنگین جرائم میں انتہائی مطلوب دہشت گرد بلال کھوسہ فائرنگ کے تبادلہ میں ہلاک ہو گیا۔
ترجمان پنجاب پولیس کے مطابق ڈیرہ غازی خان میں تھانہ کالا کی حدود میں پولیس ٹیم رات گئے معمول کے گشت پر تھی کہ جھاڑیوں میں چھپے نامعلوم مسلح افراد نے اندھا دھند فائرنگ شروع کر دی، اہلکاروں نے بہترین حکمت عملی سے محفوظ پوزیشنز لیتے ہوئے جوابی کارروائی کی۔
حکام کے مطابق فائرنگ کے تبادلے میں ایک حملہ آور مارا گیا جس کی شناخت بلال عرف بشیر کے نام سے ہوئی جبکہ ہلاک دہشت گرد کے دیگر ساتھی پسپا ہو کر فرارہو گئے جن کی تلاش کے لیے سرچ آپریشن جاری ہے۔
ترجمان نے بتایا ہے کہ ہلاک ہونے والا ملزم اقدامِ قتل، ڈکیتی، راہزنی، دہشت گردی، اور دوہرے قتل جیسے کئی سنگین مقدمات میں مطلوب تھا، ملزم سی ٹی ڈی کو بھی مطلوب تھا، دو مقدمات میں باقاعدہ نامزد تھا۔
پنجاب پولیس کے ترجمان نے یہ بھی بتایا کہ انٹیلی جنس رپورٹس کے مطابق بلال کھوسہ کا تعلق دہشت گرد تنظیم ٹی ٹی پی (فتنہ الخوارج) سے تھا، ہلاک دہشت گرد ریاستی اداروں کے خلاف منظم کارروائیوں میں ملوث تھا اور ڈیرہ غازی خان میں بدامنی پھیلانے کے عزائم رکھتا تھا۔
آئی جی پنجاب پولیس ڈاکٹر عثمان انور نے خوارجی دہشت گرد کو جہنم واصل کرنے پر ڈیرہ غازی خان پولیس کو شاباش دی ہے۔
