کراچی: (ویب ڈیسک) شہر قائد میں ڈکیتوں نے سکیورٹی گارڈ کو قتل کردیا اور اس کا اسلحہ لیکر فرار ہوگئے۔
واقعہ گزری تھانے کے علاقے ڈی ایچ اے فیز6 خیابان شہباز میں واقع بنگلے کے باہر پیش آیا، فائرنگ کے واقعے کی اطلاع ملنے پر پولیس موقع پر پہنچ گئی اور جائے وقوع سے شواہد اکٹھے کرکے واقعہ کی تفتیش شروع کر دی۔
پولیس حکام نے بتایا کہ موٹر سائیکل سوار ڈکیت اسلحہ کے زور پر شہریوں سے لوٹ مار کر رہے تھے کہ سکیورٹی گارڈ بنگلے سے اسلحہ لیکر باہر نکلا تو مسلح ڈکیتوں نے گزرتے ہوئے فائرنگ کر دی، گارڈ سینے پر گولی لگنے سے موقع پر ہی جاں بحق ہوگیا۔
امدادی ٹیموں نے جاں بحق ہونے والے گارڈ کی لاش کو ہسپتال منتقل کر دیا، مقتول گارڈ کی شناخت 23 سالہ آریان ولد محمد اسلم کے نام سے ہوئی ہے، مقتول سکیورٹی گارڈ کا آبائی تعلق نوشہرو فیروز سے تھا۔
واضح رہے کہ رواں سال شہر قائد میں ڈکیتی مزاحمت پر مسلح ملزمان کی فائرنگ سے جاں بحق ہونے والے شہریوں کی تعداد 59 ہوگئی ہے۔
