لاہور: (ویب ڈیسک) خوبرو پاکستانی اداکارہ رباب ہاشم نے ایک مداح کے غیر معمولی رویے کے بارے میں دلچسپ اور حیران کن واقعہ سنا کر مداحوں کو حیران کردیا۔
حال ہی اداکارہ رباب ہاشم نجی ٹی وی کے ایک پروگرام میں بطور مہمان شریک ہوئیں جہاں انہوں نے مختلف موضوعات پر کھل کر اظہار خیال کیا۔
پروگرام کے دوران رباب ہاشم نے بتایا کہ انہیں فوٹو اینڈ ویڈیو شیئرنگ ایپ انسٹاگرام پر ایک اکاؤنٹ سے روزانہ تقریباً 200 میسجز موصول ہو رہے تھے، ابتداء میں انہوں نے اس بات کو زیادہ اہمیت نہیں دی لیکن پھر ایک دن کچھ ایسا ہوا جس نے انہیں حیران کر دیا۔
اداکارہ نے کہا کہ ایک دن میری شوٹنگ سے چھٹی تھی اور میں گھر پر تھی، اچانک گھر کی بیل بجی، دروازہ کھولا تو ایک خاتون اور مرد موجود تھے جو اندرون سندھ سے آئے تھے۔
رباب نے بتایا کہ دروازے پر موجود اس مرد اور خاتون کے ہاتھ میں ایک باسکٹ تھی جس میں تحائف تھے، انہوں نے اصرار کیا کہ ہم بہت دور سے آئے ہیں آپ کو یہ تحائف قبول کرنے ہوں گے۔
اداکارہ کا مزید کہنا تھا کہ جب میں نے تحائف لے لیے تب بھی وہ لوگ گھر کے باہر کھڑے رہے اور جب وہ جا نہیں رہے تھے تو میں نے ان سے کہا کہ یہ تحائف واپس لے جائیں، میں نے انہیں سمجھایا کہ گھر پر آنا مناسب نہیں ہے تو بھی میسجز آنا بند نہیں ہوئے، یہ ایک بہت عجیب اور غیر معمولی تجربہ تھا۔
