لاہور: (ویب ڈیسک) معروف اداکار عثمان خالد بٹ نے کہا ہے کہ شوبز انڈسٹری میں صنفی بنیاد پر خواتین کو مردوں سے زیادہ معاوضہ ملتا ہے۔
عثمان خالد بٹ نے حال ہی میں ایک پوڈکاسٹ میں شرکت کی، جہاں انہوں نے مختلف معاملات پر کھل کر بات کی، پروگرام کے دوران بات کرتے ہوئے عثمان خالد بٹ نے دعویٰ کیا کہ شوبز انڈسٹری میں مرد اداکاروں کے مقابلے خاتون اداکاروں کو ترجیح دی جاتی ہے۔
ان کا کہنا تھا کہ انہوں نے شوبز انڈسٹری میں کبھی نسلی بنیادوں پر امتیازی سلوک کا سامنا نہیں کیا جب کہ صنفی بنیاد پر خواتین کو مردوں سے زیادہ معاوضہ ملتا ہے، شوبز انڈسٹری میں رنگت پر تفریق پائی جاتی ہے اور خوبصورتی سے متعلق شوبز انڈسٹری کی اپنی ہی فرسودہ روایات ہیں۔
شادی سے متعلق بات کرتے ہوئے انہوں نے کہا کہ ان سے ہر بار اور سوشل میڈیا پر بھی بہت سوالات کیے جاتے ہیں، جس سے اب وہ تنگ آ چکے ہیں، عثمان خالد بٹ کا کہنا تھا کہ انہوں نے شادی نہ کرنے کا فیصلہ تو نہیں کیا لیکن وہ جلد شادی کے ارادے سے رشتہ وغیرہ نہیں دیکھ رہے۔
ان کے مطابق انٹرنیٹ اور سوشل میڈیا پر ان کی شادی سے متعلق بہت پوچھا جاتا ہے اور وہ کبھی بھی سماجی دباؤ میں آکر شادی نہیں کریں گے، اداکار نے مسکراتے ہوئے کہا کہ شوبز میں ان کے ساتھ کام کرنے والی زیادہ تر مرکزی اداکارائیں بھی تاحال غیر شادی شدہ ہیں تاہم انہوں نے کسی کا نام نہیں لیا۔
عثمان خالد بٹ نے یہ شکوہ بھی کیا کہ ان سے ہر کوئی شادی سے متعلق سوال کرتا ہے لیکن کبھی کوئی ان کے پاس رشتہ لے کر نہیں آتا، ان کے مطابق ان کی ایک ہی سچی اور مخلص دوست مریم نفیس ان کی شادی کے لیے پریشان نظر آتی ہیں۔
ان کا مزید کہنا تھا کہ اداکارہ نے متعدد بار انہیں کہا کہ فلاں لڑکی سے شادی کرلو لیکن پھر چند دن بعد فون کرکے کہا کہ اس لڑکی سے شادی نہیں کرنا، وہ ذہنی مرض میں مبتلا ہے، اداکار کا کہنا تھا کہ وہ ایسی خاتون سے شادی کریں گے جو کہ خاندانی روایات کو سمجھتی ہو اور روایات کو آگے بڑھائے۔
ان کے مطابق جس لڑکی کا سینس آف ہیومر اچھا ہوگا وہ اسی سے شادی کریں گے لیکن انہیں شادی کی جلدی نہیں اور یہ کہ وہ سماجی دباؤ میں آکر شادی نہیں کریں گے۔
