نئی دہلی: (ویب ڈیسک) بھارتی سماج وادی پارٹی کی رکنِ پارلیمان، اداکارہ اور بالی ووڈ سٹار امیتابھ بچن کی اہلیہ جیا بچن ایک شخص کی ان کی ساتھ سیلفی لینے کی کوشش پر برہم ہو گئیں۔
بھارتی میڈیا کے مطابق جیا بچن دہلی کے کانسٹیٹیوشن کلب کے گیٹ پر کسی سے بات کر رہی تھیں کہ اچانک ایک شخص آیا اور سیلفی لینے کےلیے ان کے بہت قریب کھڑا ہو گیا، جیا بچن نے اسے دھکا دے کر کہا کہ یہ کیا ہے؟ جس پر اس شخص نے فوراً معذرت کی۔
ویڈیو میں ارکانِ پارلیمان میسا بھارتی اور پرینکا چترویدی بھی نظر آ رہی تھیں، میسا بھارتی کو بھی کلب میں داخل ہونے سے پہلے اس شخص سے کچھ کہتے ہوئے دیکھا گیا۔
— Ghar Ke Kalesh (@gharkekalesh) August 12, 2025
سینئر اداکارہ اور سیاستدان جیا بچن کبھی بھی لوگوں کے ساتھ تصویر بنوانے کی بہت شوقین نہیں رہی ہیں، کئی مواقع پر انہیں اپنی ذاتی حدود میں مداخلت کرنے والوں کو ڈانٹتے اور سخت لہجے میں جواب دیتے دیکھا گیا ہے۔
اپریل میں منوج کمار کے لیے منعقد دعائیہ تقریب میں ایک بزرگ مداح نے ان سے تصویر کی درخواست کی تو وہ برہم ہو گئی تھیں۔
اُس وقت وہ لوگوں سے بات کر رہی تھیں جب ایک خاتون نے ان کے کندھے پر ہاتھ رکھا، جیا بچن کے مڑنے پر ایک شخص نے دونوں کی تصویر لینے کی کوشش کی، خاتون نے مصافحہ کرنے کی کوشش کی لیکن جیا بچن نے ان کا ہاتھ جھٹک دیا اور تصویر لینے والے شخص کو سرزنش کی۔
