لاہور: (ویب ڈیسک) سینئر اداکارہ شائستہ جبیں نے انکشاف کیا ہے کہ ان کے خاندان کے کسی بھی فرد کا شوبز سے کوئی تعلق نہیں، نہ ہی آج تک خاندان انہیں بطور اداکارہ تسلیم کرتا ہے۔
اداکارہ نے حال ہی میں دنیا نیوز کے مقبول ترین مزاحیہ شو’مذاق رات‘ میں شرکت کی، جہاں انہوں نے مختلف معاملات پر کھل کر گفتگو کی۔
شائستہ جبیں کے مطابق ان کے والد ان کے بچپن میں ہی انتقال کر گئے تھے، جس کے بعد گھر کا بڑا فرد ہونے کے ناطے ان پر ذمہ داریاں عائد ہوئیں اور وہ ان ہی ذمہ داریوں کو نبھانے میں مصروف رہیں۔
ان کا کہنا تھا کہ زمانہ طالب علمی میں کالج کی طرف سے پاکستان ٹیلی وژن (پی ٹی وی) کے دورے کے دوران ان کی خوبصورتی دیکھ کر پروڈیوسر یاور حیات نے انہیں ڈراموں میں کام کی پیشکش کی لیکن انہوں نے خاندان کی وجہ سے انکار کر دیا۔
اداکارہ نے بتایا کہ اداکارہ بننے کے بجائے نیوز کاسٹر بننے کا شوق تھا لیکن حادثاتی طور پر وہ اداکارہ بن گئیں، انہوں نے سٹیج اور تھیٹر میں بھی کام کیا۔
ایک سوال کے جواب میں شائستہ جبیں کا کہنا تھا کہ ذمہ داریوں کی وجہ سے انہیں کبھی اپنی ذات کا خیال نہیں آیا، انہیں محبت کرنے کی فرصت ملی، نہ انہیں اس طرح کے خیالات آئے۔
انہوں نے کہا کہ ان کے شوبز میں کام کرنے کی وجہ سے بھی ان کے کسی سے تعلقات نہیں بن سکے، کیونکہ یہی سوچا اور سمجھا جاتا تھا کہ وہ شوبز میں کام کرتی ہیں تو آزادی پسند ہوں گی، سماج میں شوبز سمیت دیگر شعبوں میں کام کرنے والی خواتین سے متعلق غلط سوچ پائی جاتی ہے، سمجھا جاتا ہے کہ وہ پتا نہیں کس طرح کی آزادی چاہتی ہیں۔
ایک اور سوال کے جواب میں شائستہ جبیں نے بتایا کہ ان سے قبل ان کے خاندان کا کوئی بھی شخص شوبز میں نہیں تھا اور اب تک بھی ان کے خاندان کا کوئی فرد اس انڈسٹری میں نہیں ہے، مستقبل میں بھی ان کے خاندان سے کوئی بھی شخص شوبز کا حصہ نہیں بنے گا۔
اداکارہ نے اسی بات پر کہا کہ ان کا خاندان آج تک انہیں بطور اداکار تسلیم نہیں کرتا، ان کا خاندان بہت رجعت پسند ہے، تاہم انہوں نے یہ واضح نہیں کیا کہ انہیں بطور اداکار کون سے رشتے دار قبول نہیں کرتے؟
