لاہور: (ویب ڈیسک) پاکستان تحریک انصاف (پی ٹی آئی) کے سینئر رہنما صداقت علی عباسی نے مری میں اپنے ہوٹلنگ سے متعلق کاروبار کی خبروں کو جعلی قرار دیدیا۔
پاکستان تحریک انصاف کے رکن قومی اسمبلی صداقت علی عباسی نے سماجی رابطے کی ویب سائٹ ٹویٹر پر ایک ویڈیو اپ لوڈ کی گئی۔ اپ لوڈ کی گئی ویڈیو 1 منٹ 42 سکینڈ پر محیط ہے۔
ویڈیو کے کیپشن میں انہوں نے فیک نیوز اور لعنت اللہ علی الکاذبین بھی لکھا۔
*** فیک نیوز الرٹ *****
— Sadaqat Ali Abbasi (@Sadaqat_Ali) January 12, 2022
مری میں ہوٹل ایسوسی ایشنز کے حوالے Whatsapp گروپس میں چلنے والی خبر فیک ہے۔
میرے ہوٹلنگ کے کاروبار کی خبر بھی فیک ہے۔
برف اٹھانے کا کوئی ٹھیکہ دینے کی خبر بھی فیک ہے۔
(لعنت اللہ علی الکاذبین) pic.twitter.com/lPFSfzrbD5
پی ٹی آئی رکن قومی اسمبلی نے ویڈیو پیغام میں کہا کہ میرے حوالے سے کچھ فیک نیوز شیئر ہو رہی ہیں، میں اس کی وضاحت کرنا چاہتا ہوں، مری میں ہوٹلنگ ایسوسی ایشن میں میرا کوئی عمل دخل نہیں ہے، یہاں پر ہزاروں ریسٹ ہاؤسز ہیں اور یہاں پر دو ایسوسی ایشن ہیں۔ ان دونوں میں میرے جاننے والے لوگ ہیں۔ ان میں کچھ جاننے والے ہیں، ان میں میرے رشتے دار بھی شامل ہیں جن کا یہاں کاروبار ہے، اسی لیے میرے رکن قومی اسمبلی بننے سے قبل بھی میرے رشتے دار یہاں کاروبار کرتے تھے، ہوٹل ایسوسی ایشن میں کچھ سیاسی مخالفین بھی موجود ہیں۔
دوسرے نمبر پر بات کرتے ہوئے ان کا کہنا تھا کہ میرا ذاتی طور پر پورے حلقے میں سوائے ایک ویلفیئر سکول کے کوئی کاروبار نہیں ہے اور نہ ہی زمین کا بالواسطہ اور بلاواسطہ کوئی کاروبار ہے اور نہ ہی کسی کے ساتھ کوئی پارٹنر شپ ہے۔
پرائیویٹ ٹھیکہ دینے سے متعلق بات کرتے ہوئے پی ٹی آئی رکن قومی اسمبلی کا کہنا تھا کہ مری میں سڑکوں پر برف کو صاف کرنے سے متعلق بھی باتیں ہو رہی ہیں، اور کہا جا رہا ہے ان ٹھیکوں میں میرے کچھ لوگ شامل ہیں۔ یہاں بتاتا چلوں کہ یہاں پر پنجاب ہائی وے خود برف اُٹھاتی ہے اور یہاں پر ان کی اپنی مشینری موجود ہے۔ نہ تو میرے پاس کوئی ٹھیکہ ہے اور نہ ہی مجھے دیا گیا ہے۔
آخر میں انہوں نے کہا کہ فیک نیوز پھیلانے والوں کو اللہ تعالیٰ ہی پوچھے۔
