تازہ ترین
  • بریکنگ :- وزارت ریلوےکی کرایوں میں 10سے20 فیصد اضافے کی تجویز
  • بریکنگ :- ریلوےکویومیہ ایک کروڑ 84 لاکھ روپےکےمالی بوجھ کاسامنا ہے،ذرائع
  • بریکنگ :- لاہور:ریلوےسسٹم پرروزانہ 4 لاکھ لٹر ڈیزل استعمال ہوتا ہے،ذرائع
  • بریکنگ :- ٹرینوں کےکرایوں میں اضافےکی سمری وفاقی حکومت کوارسال

لتا منگیشکر کی صحت سے متعلق جھوٹی خبریں پھیلائی جانے لگیں، اہل خانہ پریشان

Published On 22 January,2022 05:30 pm

نئی دہلی: (ویب ڈیسک) معروف بھارتی گلوکارہ لتا منگیشکر دو ہفتوں سے ’نمونیا‘ بخار اور کورونا کے باعث ہسپتال میں داخل ہیں اور ان کی صحت کے حوالے سے مختلف افواہیں پھیلنے پر ان کے اہل خانہ پریشان دکھائی دے رہے ہیں۔

این ڈی ٹی وی کے مطابق لتا منگیشکر کی صحت کے حوالے سے جعلی خبریں پھیلنے کے بعد مرکزی وزیر اور سابق اداکارہ سمرتی ایرانی بھی پریشان دکھائی دیں اور انہوں نے ایک ٹوئٹ کے ذریعے عوام سے اپیل کی کہ وہ لیجنڈری گلوکارہ کے حوالے سے افواہیں پھیلانے سے گریز کریں۔

سمرتی ایرانی نے لتا منگیشکر کے اہل خانہ کی جانب سے ہسپتال کی ڈاکٹر کی جانب سے بھیجے گئے پیغام کا سکرین شاٹ بھی شیئر کیا۔

ڈاکٹر کے پیغام کے مطابق اگرچہ تاحال لتا منگیشکر انتہائی نگہداشت کے وارڈ (آئی سی یو) میں داخل ہیں، تاہم ان کی طبیعت میں بہتری ہونا شروع ہوئی ہے۔

سمرتی ایرانی نے لوگوں سے لتا منگیشکر کے حوالے سے افواہیں نہ پھیلانے سمیت ان کی صحت یابی کے لیے دعاؤں کی اپیل بھی کی۔

انڈین ایکسپریس نے بھی رپورٹ میں بتایا کہ لتا منگیشکر کی صحت میں مسلسل بہتری آ رہی ہے، تاہم انہیں تاحال آئی سی یو میں ہی رکھا گیا ہے۔

رپورٹ میں ہسپتال اور لتا منگیشکر کے خاندانی ذرائع کا حوالہ دیتے ہوئے بتایا گیا کہ زائد العمری کی وجہ سے لتا منگیشر کی حالت انتہائی سست رفتاری سے بہتر ہو رہی ہے، تاہم وہ پہلے سے کافی بہتر ہے۔