کوئٹہ: (دنیا نیوز) بلوچستان کے سب سے بڑے سرکاری ہسپتال کا شعبہ حادثات گزشتہ 2 سال سے غیر فعال ہے جس کی تعمیر کے لیے اربوں روپے بجٹ میں رکھنے کے باوجود بھی محکمہ بی اینڈ آر کی جانب سے توجہ نہیں دی جا رہی۔
کوئٹہ کے سب سے بڑے سرکاری سول ہسپتال میں نیا ٹراما سینٹر بننے کے بعد پرانی شعبہ حادثات کی عمارت کو دوبارہ تعمیر کرنے کے لئے توڑا گیا مگر دو سال گزرنے کے باوجود عمارت کا ملبہ جوں کا توں پڑا ہوا ہے، ہسپتال کے داخلی دروازے سے کسی بھی ہنگامی صورت حال میں مریضوں کو لانا مشکل ہو گیا ہے۔
ایم ایس سول ہسپتال ڈاکٹر جاوید کا کہنا ہے کہ مریضوں کی زندگی اولین ترجیح ہے۔ محکمے کو کئی بار اس حوالے سے آگاہ بھی کیا گیا ہے تاہم صورت حال بہتر نہ ہوسکی جس کے باعث مشکلات کا سامنا ہے۔
شعبہ حادثات جس کی تعمیر کی ذمہ داری محکمہ بی اینڈ آر کو 2 سال پہلے دی گئی تھی جو اتناعرصہ گزر جانے کے باوجود تعمیر نہ ہو سکی جبکہ محکمہ صحت کی باگ ڈور وزیر اعلیٰ بلوچستان جام کمال کے ہاتھ میں ہونے کے باوجود مسلے پر توجہ نہ دینا حکومتی کارکردگی پر سوالیہ نشان ہے۔
