لاہور: (دنیانیوز) نگران وزیراعلیٰ پنجاب محسن نقوی نے صوبائی دارالحکومت میں کینسر ہسپتال بنانے کی اصولی منظوری دے دی۔
وزیراعلیٰ محسن نقوی نے مناواں ہسپتال کا دورہ کیا، انہوں نے کینسر ہسپتال کے لئے مجوزہ اراضی اور ہسپتال کی عمارت کا معائنہ کیا، وز یراعلیٰ نے ہسپتال کی مرکزی عمارت سے ملحقہ بلڈنگ کا بھی جائزہ لیا، محسن نقوی نے مناواں ہسپتال کو کینسر ہسپتال میں تبدیل کرنے کا ٹاسک دے دیا۔
بعدازاں وزیراعلیٰ محسن نقوی کی زیر صدارت مناواں ہسپتال کے کمیٹی روم میں اجلاس ہوا جس میں کینسر ہسپتال کے امور کا جائزہ لیا گیا، وزیراعلیٰ نے کینسر ہسپتال کے حوالے سے پلان طلب کرلیا۔
چیف سیکرٹری،سیکرٹریز صحت، خزانہ، تعمیرات ومواصلات، سپیشل سیکرٹری ہیلتھ، وائس چانسلر کنگ ایڈورڈ میڈیکل یونیورسٹی اور متعلقہ حکام بھی اس موقع پر موجود تھے۔
اس موقع پر گفتگو کرتے ہوئے محسن نقوی کا کہنا تھا کہ لوگ کینسر کے علاج کے لئے دھکے کھا رہے ہیں،لاہور میں کینسر ہسپتال بنے گا،پنجاب 14 کروڑ عوام کا صوبہ ہے، ایک بھی سرکاری سٹیٹ آف دی آرٹ کینسر ہسپتال نہیں ہے، سرکاری سطح پر اعلیٰ معیار کا کینسر ہسپتال پنجاب کے عوام کی ضرورت ہے۔
انہوں نے مزید کہا کہ کینسر کے مریضوں کو سرکاری سطح پر ایک سٹیٹ آف دی آرٹ ہسپتال مہیا کرنا حکومت کی ذمہ داری ہے، وزیراعلیٰ نے کینسر ہسپتال کا ڈیزائن اور دیگر امور جلد طے کرنے کی ہدایت کرتے ہوئے کہا کہ مشینری اور آلات خریدنے کی بھی پلاننگ کی جائے۔
