مظفرآباد: (دنیا نیوز) آزاد جموں و کشمیر میں ڈینگی وائرس کے کیسز میں مسلسل اضافہ ہو رہا ہے، گزشتہ 24 گھنٹوں کے دوران مزید 70 افراد میں ڈینگی کی تصدیق ہوئی ہے۔
ڈینگی کنٹرول روم کے مطابق خطے میں مجموعی مریضوں کی تعداد 4018 تک پہنچ گئی ہے جبکہ 2 افراد جان کی بازی ہار چکے ہیں۔
اعداد و شمار کے مطابق مظفرآباد میں سب سے زیادہ 2839 کیسز رپورٹ ہوئے،باغ میں 127، میرپور میں 871 کیسز سامنے آئے، جہلم ویلی میں 3، نیلم میں 44، سدھنوتی میں 3، حویلی میں 6 اور پونچھ میں 45 کیسز رپورٹ ہوئے جبکہ کوٹلی میں 2 اور بھمبر میں 19 کیسز کی تصدیق ہوئی۔
ڈینگی کنٹرول روم کے مطابق مختلف ہسپتالوں میں 48 مریض زیر علاج ہیں جبکہ 510 مریض صحت یاب ہو کر گھروں کو منتقل کر دیئے گئے ہیں۔
محکمہ صحت کے حکام نے شہریوں سے اپیل کی ہے کہ وہ صفائی، مچھروں کی افزائش روکنے اور احتیاطی تدابیر پر عمل کریں تاکہ ڈینگی کے پھیلاؤ کو قابو میں رکھا جا سکے۔
