ملتان: (دنیا نیوز) انسداد دہشت گردی فورس نے ملتان میں خفیہ کارروائی کے دوران کالعدم تنظیم کے تین دہشت گرد گرفتار کر لئے۔
سی ٹی ڈی حکام کے مطابق گرفتار دہشت گردوں میں حسنین معاویہ، عثمان ضیا اور اقبال شامل ہیں جنہیں خفیہ اطلاع پر بستی شورکوٹ کے قریب سے گرفتار کیا گیا۔
تینوں دہشت گردوں کا تعلق کالعدم تنظیم سے ہے جن کے قبضہ سے 4 دستی بم، اسلحہ اور ممنوعہ لٹریچر سمیت دیگر سامان برآمد کر لیا گیا ہے۔ سی ٹی ڈی حکام کا کہنا ہے کہ ابتدائی تفتیش کے دوران گرفتار دہشت گردوں نے یومِ دفاع کے موقع پر سیکیورٹی اداروں پر حملوں اور حساس تنصیبات کو ہدف بنانے کی منصوبہ بندی کا اعتراف کیا ہے، تاہم ان سے نامعلوم مقام پر مزید تفتیش جاری ہے۔
