شاہ محمود اور ڈاکٹر فوزیہ کی ملاقات، عافیہ کی پاکستان منتقلی پر تبادلہ خیال

اسلام آباد: (دنیا نیوز) شاہ محمود قرشی کا کہنا ہے عافیہ صدیقی کیلئے کونسلر کے باقاعدگی سے وزٹ کی ہدایت کر دی، وزٹ کا مقصد عافیہ کی صحت اور انسانی و قانون حقوق کا تحفظ یقینی بنانا ہے۔

 وزیر خارجہ شاہ محمود قریشی سے عافیہ صدیقی کی بہن ڈاکٹر فوزیہ نے ملاقات کی جس میں امریکی جیل میں قید ڈاکٹر عافیہ کی پاکستان منتقلی پر تبادلہ خیال کیا گیا۔ وزیر خارجہ نے ڈاکٹر فوزیہ کو عافیہ صدیقی کیس کے سلسلے میں کاوشوں سے آگاہ کیا، عافیہ صدیقی کے لیے کونسلر وزٹس کے باقاعدگی سے اہتمام کی ہدایت کر دی۔

یاد رہے امریکی جیل میں قید پاکستانی خاتون عافیہ صدیقی نے وزیراعظم عمران خان سے رہائی میں مدد کی اپیل کی تھی۔ سفارتی ذرائع کے مطابق ڈاکٹر عافیہ صدیقی نے وزیراعظم عمران خان کے نام خط لکھا جس میں ان کا کہنا تھا عمران خان نے ماضی میں میری بہت حمایت کی، اب وزیراعظم بننے کے بعد میری رہائی میں مدد کریں، میں اس قید سے باہر نکلنا چاہتی ہوں، امریکا میں میری سزا غیر قانونی ہے، مجھے اغوا کر کے امریکا لایا گیا تھا۔

عافیہ صدیقی نے خط میں مزید لکھا عمران خان پر تنقید کرنے والوں کو اپنی تنقید بند کر دینی چاہیے، انہوں نے ماضی میں غلطیاں کیں مگر اب وہ ویسے نہیں رہے، اسلامی قوانین میں غلطیوں پر توبہ کرنے والے کی غلطیاں معاف کر دی جاتی ہیں۔ خط میں کہا گیا اگر کسی کو عمران خان کے حوالے سے شک ہے تو میں اسے مناظرے کا چیلنج دیتی ہوں، عمران خان ہمیشہ سے میرے ہیرو رہے ہیں انھیں اپنے اردگرد موجود منافقین سے محتاط رہنا چاہیے۔