لاہور: (دنیا نیوز) سابق وزیراعظم نواز شریف کی جیل میں طبیعت ناساز ہو گئی جس کے بعد انھیں علاج معالجے کیلئے پنجاب انسٹیوٹ آف کارڈیالوجی منتقل کئے جانے کا امکان ہے۔
بتایا گیا ہے کہ کوٹ لکھپت جیل میں قید سابق وزیراعظم نواز شریف کی طبعیت خراب ہو گئی جس پر ان کا فوری میڈیکل چیک اپ کروایا گیا، حکام کے مطابق اگر ڈاکٹروں نے تجویز کیا تو انھیں پنجاب انسٹیوٹ آف کارڈیالوجی منتقل کر دیا جائے گا۔
واضح رہے کہ سابق وزیراعظم نوازشریف کو اسلام آباد کی احتساب عدالت نے العزیزیہ کیس میں سات سال قید کی سزا سنائی گئی تھی جس پر وہ کوٹ لکھپت جیل میں سزا بھگت رہے ہیں، گزشتہ روز ان کے بھائی اور صدر ن لیگ شہباز شریف نے حکومت پر الزام عائد کیا تھا کہ نوازشریف دل اور گردوں سمیت دیگر امراض میں مبتلا ہیں اس کے باوجود حکومت انھیں ہسپتال منتقل نہیں کر رہی۔
