کراچی: (دنیا نیوز) کراچی کے علاقے شیر شاہ میں ڈائپر بنانے والی فیکٹری میں آگ لگ گئی، فائر بریگیڈ کی سات گاڑیاں آگ پر قابوپانے میں مصروف ہیں۔
شیرشاہ کے علاقے پراچہ چوک کے قریب ڈائپر بنانے والی فیکٹری میں جمعہ کی صبح اچانک آگ بھڑک اٹھی جس نے دیکھتے ہی دیکھتے فیکٹری کو لپیٹ میں لے لیا، آتشزدگی کے باعث علاقے میں دھویں کے بادل چھا گئے۔
آتشزدگی کی اطلاع پر فائر بریگیڈ کی دو گاڑیاں فوری طور پر روانہ کی گئیں، بڑھتی آگ کے باعث مزید پانچ گاڑیاں آگ پر قابو پانے کیلئے پہنچ گئیں، واٹر ٹینکرز کے ذریعے بھی فائر بریگیڈ کی گاڑیوں کیلئے پانی پہنچایا گیا، فائر بریگیڈ کے عملے نے آگ کو مزید پھیلنے سے روک دیا۔
فائر بریگیڈ حکام کے مطابق فیکٹری سے تمام ملازمین کو نکال لیا گیا ہے، آگ لگنے کی وجوہات کا فوری تعین نہیں کیا جا سکا۔
