اسلام آباد: (دنیا نیوز) وزیراعظم عمران خان نے کہا ہے کہ بڑے عہدوں پر جرائم پیشہ افراد کے ہونے سے ملک ترقی نہیں کر سکتا۔ مجرمان تجوریاں بھرتے رہیں تو ملک ترقی نہیں کرے گا۔
تفصیلات کے مطابق وزیراعظم عمران خان سے بلوچستان نیشنل سیکیورٹی ورکشاپ کے شرکا نے ملاقات کی۔ اس موقع پر گفتگو کرتے ہوئے ان کا کہنا تھا کہ نیشنل سیکیورٹی کا اہم جزو خود انحصاری اور مالی استحکام ہے۔
وزیراعظم کا کہنا تھا کہ قرضوں میں پھنسی قوم کیلئے نیشنل سیکیورٹی کے مسائل ہوتے ہیں۔ مالی مشکلات کا شکار قومیں انسانی وسائل کے فروغ پر توجہ نہیں دے سکتیں۔ تاریخ گواہ ہے انسانی وسائل پر توجہ دینے والی قوموں نے ترقی کی۔ ان کا کہنا تھا کہ 2020ء میں شرح نمو میں اضافے پر توجہ دی جائے گی۔
یہ بھی پڑھیں: نیب آرڈیننس کا مقصد سرمایہ کاری بڑھانا ہے: وزیراعظم عمران خان
پاک چین اقتصادی راہداری منصوبے پر بارت کرتے ہوئے عمران خان نے کہا کہ سی پیک کا فائدہ پورے ملک خصوصاً بلوچستان کو ہوگا جبکہ گوادر کی ترقی سے پورا صوبہ مستفید ہوگا۔
ان کا کہنا تھا کہ بڑے عہدوں پر جرائم پیشہ افراد کے ہونے سے ملک ترقی نہیں کر سکتا۔ مجرموں کو چھوڑ کر دوسرے امور پر توجہ دینے کا کہنے والے ملک کے خیر خواہ نہیں ہیں۔ مجرمان تجوریاں بھرتے رہیں تو ملک ترقی نہیں کرے گا۔
انہوں نے کہا کہ کرپشن بے نقاب ہونے پر خوفزدہ لوگ زیادہ شور مچا رہے ہیں۔ خوف میں مبتلا کر کے ووٹ حاصل کرنے والے لیڈر نہیں کہلاتے۔ ایسے لوگ خوف کی فضا پیدا کرکے عوام کو گمراہ کرتے ہیں۔
یہ بھی پڑھیں: حکومت کا سال 2020ء کو عوامی فلاحی سال قرار دینے کا فیصلہ
