کراچی: (دنیا نیوز) کراچی میں موسلا دھار بارش کے بعد موبائل اور انٹر نیٹ سروس متاثر، شہر قائد کے کئی علاقوں میں سگنلز غائب ہوگئے، لوگوں کو رابطوں میں مشکلات کا سامنا ہے۔
مون سون بارشوں کے سلسلے نے کراچی کا حلیہ ہی بگاڑ دیا۔ بادل ایسے برسے کے جل تھل ایک کر دیا، سڑکوں پر کئی کئی فٹ پانی جمع ہوگیا۔ گزشتہ روز فیصل بیس پر سب سے زیادہ 230 ملی میٹر بارش ریکارڈ کی گئی۔ سر جانی ٹاؤن میں 195، کیماڑی میں 169 اور ناظم آباد میں 162 ملی میٹر بارش ہوئی۔
شہر قائد کے کئی علاقوں سے بارش کے پانی کی نکاسی تا حال نہ ہوسکی، ڈیفنس اور کورنگی کراسنگ تاحال زیر آب ہیں، طوفانی بارش سے نرسری فرنیچر مارکیٹ میں پانچ سے سات فٹ تک پانی جمع ہوا، دکانوں میں پانی داخل ہونے سے قیمتی فرنیچر خراب ہوگیا۔
بارش کے بعد مختلف علاقوں میں امدادی سرگرمیاں بھی جاری ہیں۔ نیا ناظم آباد میں ایدھی فاؤنڈیشن نے ریسکیو آپریشن کیا، گھر کی چھتوں پر پناہ گزیں افراد کو محفوظ مقام پر منتقل کر دیا گیا۔
بارش کے بعد سے متعدد علاقوں میں بجلی بحال نہ ہوسکی۔ قائد آباد گلشن حدید، گلشن معمارمیں بجلی کی بندش کو 24 گھنٹے گزر گئے۔ شاہ فیصل کالونی، گرین ٹاؤن، شمسی سوسائٹی سمیت متعدد علاقے بھی متاثر ہیں، شاہراہ فیصل پر گزشتہ روز پانی میں پھنس جانے والی بے شمار گاڑیاں اب بھی موجود ہیں۔ پانی کے باعث لوگ گاڑیاں سڑک پر ہی چھوڑ گئے تھے۔
