اسلام آباد: (دنیا نیوز) وزیراعظم عمران خان نے کہا ہے کہ کشمیریوں نے حق پر قائم رہتے ہوئے سنتِ امام حسین کو زندہ رکھا اور کربلا کی طرح کشمیر کو بھی معرکہ حق وباطل کی ایک عظیم مثال بنا دیا ہے۔
وزیراعظم عمران خان نے یوم عاشور 10 محرم الحرام 1442ھ کے موقع پر قوم کے نام اپنے پیغام میں کہا ہے کہ آج دنیا بھر کے مسلمان جگر گوشہ بتول، نواسہ خَاتم اَلنّبِیین صلی اللہ علیہ و علی آلہ و اصحٰبہ وسلم، امامِ عالی مقام حضرتِ امام حسین رضی اللہ تعالیٰ عنہ کی شہادتِ عظمیٰ کی بے مثال ولازوال قربانی کی یاد کو تازہ کر رہے ہیں۔
وزیراعظم نے کہا کہ اگرچہ یومِ عاشور مختلف اعتبار سے بڑی اہمیت کا حامل ہے تاہم تاریخ اسلام میں اس دن کو ایک الگ رفعت و بلندی اور خاص اہمیت و انفرادیت امام عالی مقام کی شہادت اور واقعہ کربلا کی بدولت حاصل ہوئی ہے۔
There are 3 imp messages for us from Imam Hussain AS, his family & followers sacrifice at Karbala. 1. Immortality is earned by those who give the supreme sacrifice of their lives to stand against tyranny & injustice. It is not earned simply by being rich, powerful or educated.
— Imran Khan (@ImranKhanPTI) August 30, 2020
انہوں نے کہا کہ کربلا کا یہ عظیم معرکہ حق و باطل ہمیں یہ بات باور کراتا ہے کہ اسلام کی اعلیٰ اقدار کے فروغ و احیا کیلئے کسی بھی قربانی سے دریغ نہ کرنا ہی عزیمت اور کامیابی ہے۔
وزیراعظم نے کہا کہ جذبہ شبیری مسلمانوں کے ایمان و یقین، سچائی اور اصول پسندی کی روایات کو جلا بخشتا ہے۔ یہ اسلام کے ابدی پیغام اور جذبہ قربانی کی لازوال اور روح پرور روایت کی آبیاری کا سرچشمہ بھی ہے جس کی نظیر تاریخ انسانی میں مشکل سے ہی ملتی ہے۔
عمران خان نے کہا کہ میرے نزدیک اسوہ حسین کا یہ پیغام ہر قلِب سلیم کیلئے ہے کہ وہ راہ حق میں آنے والی ہر پریشانی کو خندہ پیشانی سے قبول کرتے ہوئے اپنی جان جانِ آفرین کہ سپرد کر دے۔ اسی جذبہ سے سرشاری کے بعد ہم وطن عزیز اور اقوام عالم میں کوئی قابل ذکر کردار ادا کر سکتے ہیں۔
انہوں نے کہا کہ اس موقع پر ہمیں بھارتی غیر قانونی مقبوضہ جموں و کشمیر میں بھارتی سامراج سے برسر پیکار عوام کی قربانیوں کو بھی خراجِ تحسین پیش کرنا چاہیے جنہوں نے حق پر قائم رہتے ہوئے سنتِ امام حسین کو زندہ رکھا اور کربلا کی طرح کشمیر کو بھی معرکہ حق و باطل کی ایک عظیم مثال بنا دیا ہے۔
The brave Kashmiris who are fighting against the worst form of military oppression & tyranny should be inspired by Karbala to stay steadfast in their courage because their struggle against tyranny & injustice will succeed as the martyrs of Karbala showed us.
— Imran Khan (@ImranKhanPTI) August 30, 2020
وزیراعظم نے کہا کہ گذشتہ کچھ عرصہ سے کورونا وائرس کی وبا نے پوری دنیا کو اپنی لپیٹ میں لے رکھا ہے جس میں ارض پاک بھی شامل تھی لیکن اللہ پاک کی مدد، حکومت کے بروقت اقدامات اور قوم کے بھر پور تعاون سے اس وبا کے پھیلائو پرکافی حد تک قابو پا لیا گیا ہے جس پر پوری پاکستانی قوم کو اللہ تعالیٰ کا شکر گزار ہونا چاہیے۔
یوم عاشور کے دن قوم سے اپیل کرتے ہوئے وزیراعظم عمران خان نے اْمید ظاہر کی کہ آپ محرم الحرام کی تقاریب میں بھی حکومت پاکستان کی طرف سے جاری کردہ احتیاطی تدابیر پر ضرور عمل پیرا ہوں گے اور کورونا وائرس سے محفوظ ماحول میں یوم عاشور عقیدت واحترام کے ساتھ، فرقہ واریت اور تعصب کو بالائے طاق رکھتے ہوئے منائیں گے اور امن وامان کو بھی یقینی بنائیں گے۔
انہوں نے کہا کہ اس موقع پر وطن عزیز کی ترقی و خوشحالی کیلئے ضرور دعائیں کی جائیں۔ خدائے بزرگ و برتر آپ کی دعاوں کو شرف قبولیت سے نوازے۔
