اسلام آباد: (دنیا نیوز) سابق وزیراعظم نواز شریف نے العزیزیہ اور ایون فیلڈ ریفرنس کے خلاف اپیلوں کی سماعت کے موقع پر حاضری سے استثنیٰ کی درخواست دائر کر دی۔
نواز شریف نے درخواستوں میں موقف اختیار کیا کہ بیرون ملک زیرعلاج ہونے کے باعث اپیلوں کی سماعت کے موقع پر پیش نہیں ہوسکتا۔ استدعا ہے کہ طبی بنیادوں پر حاضری سے استثنیٰ دیا جائے۔
ضمانت میں توسیع کے معاملے پر سابق وزیراعظم نے کہا کہ کورونا کے بعد لاک ڈاؤن کی وجہ سے برطانیہ میں علاج مکمل نہیں ہو سکا، ضمانت میں توسیع کے لیے کئی دستاویزات فراہم کیں، لیکن پنجاب حکومت نے طے شدہ منصوبے کے تحت ضمانت میں توسیع کی درخواست مسترد کی۔
دوسری جانب مریم نواز اور کیپٹن صفدر کے وکیل امجد پرویز نے چھٹیوں پر ہونے کے باعث ایون فیلڈ ریفرنس پر سماعت ملتوی کرنے کی درخواست دائر کر دی۔ وکیل امجد پرویز نے کہا کہ 5 ستمبر تک چھٹیوں پر ہوں، سماعت اس کے بعد رکھی جائے۔
اسلام آباد ہائی کورٹ کے جسٹس عامر فاروق اور جسٹس محسن اختر کیانی العزیزیہ، ایون فیلڈ اور فلیگ شپ ریفرنس کے خلاف شریف فیملی اور نیب کی اپیلوں پر کل سماعت کریں گے۔
