کراچی: (دنیا نیوز) کراچی کی لائٹ ہاؤس مارکیٹ میں جوتوں کے گودام میں آتشزدگی کے نتیجے میں لاکھوں روپے کا سامان جل کر خاکستر ہوگیا۔ فائر بریگیڈ کی سنارکل سمیت پانچ گاڑیوں نے ایک گھنٹے میں آگ پر قابو پالیا۔
اولڈ سٹی ایریا میں واقعے لائٹ ہاوس مارکیٹ میں جوتوں کے گودام میں اچانک آگ بھڑک اٹھی، ابتدائی طور پر علاقہ مکینوں نے آگ پر قابو پانے کی کوشش کی تاہم ناکامی کی صورت میں فائر بریگیڈ کو طلب کیا۔ آگ رہائشی عمارت کی بالائی منزل پر قائم گودام میں لگی، جس پر فائر بریگیڈ نے ایک گھنٹے کی جدوجہد کے بعد آگ پر قابو پایا۔
فائر بریگیڈ حکام کے مطابق گودام میں بڑی تعداد میں جوتا اور پرانا کپڑا موجود تھا۔ آپریشن میں اسنارکل سمیت پانچ گاڑیوں نے حصہ لیا۔ ابتدائی طور پر آگ لگنے کی وجہ شارٹ سرکٹ بتائی جا رہی ہے۔ آتشزدگی کے نتیجے میں خوش قسمتی سے کوئی جانی نقصان نہیں ہوا جبکہ گودام مالک کا لاکھوں روپے کا سامان جل کر خاکستر ہو گیا۔
