اسلام آباد: (دنیا نیوز) ترجمان دفتر خارجہ زاہد حفیظ چودھری نے ایک بار پھر اسرائیل سے متعلق قیاس آرائیوں کو مسترد کرتے ہوئے واضح کیا ہے کہ اسرائیل کو تسلیم کرنے کی کوئی تجویز زیر غور نہیں ہے۔
ترجمان دفتر خارجہ نے کہا ہے کہ پاکستان کے مسئلہ فلسطین کے حل سے متعلق اپنے اصولی موقف میں کوئی تبدیلی نہیں آئی۔ سی پیک میں مزید توسیع کیلئے چین سے رابطے میں ہیں۔ پاکستان پرامن اور مستحکم افغانستان کیلئے کردار ادا کرتا رہے گا۔
جمعرات کو ہفتہ وار بریفنگ کے دوران ترجمان کا کہنا تھا کہ وزیر اعظم عمران خان کا حالیہ دورہ افغانستان اہمیت کا حامل تھا۔ پاکستان پرامن اور مستحکم افغانستان کیلئے کردار ادا کرتا رہے گا۔ پرامن افغانستان ہمارے اور پورے خطے کے مفاد میں ہے۔
کشمیر کے حوالے سے ترجمان نے کہا کہ مقبوضہ کشمیر میں پانچ اگست 2019ء کے بھارتی غیر قانونی اور یکطرفہ اقدامات کے بعد فوجی محاصرے کے 479 دن مکمل گئے جبکہ بھارتی سپریم کورٹ نے بھی مقبوضہ کشمیر میں لاک ڈاؤن کو غیر آئینی قرار دیا ہے۔ کوڈ 19 وبا کے باوجود کشمیریوں کو طبی اور بنیادی ضروریات زندگی تک رسائی سے محروم کر دیا گیا ہے جبکہ بھارتی فوج نے ظلم۔کی انتہا کرتے ہوئے ماہ نومبر میں مزید 14 بے گناہ کشمیریوں کو شہید کر دیا ہے۔
ترجمان نے کہا کہ بھارت مظالم۔کے ذریعے کشمیر یوں کے جذبہ حریت کو دبا نہیں سکتا۔بھارت مقبوضہ کشمیر میں نسل کشی کی مہم چلا رہا ہے جبکہ مقبوضہ کشمیر میں انسانی حقوق کی سنگین خلاف ورزیوں کی عالمی اداروں نے بھی تصدیق کی ہے۔ ترجمان نے کہا کہ بھارت پاکستان پر الزامات لگا کر مسئلہ کشمیر سے عالمی توجہ ہٹانے کی کوشش کر رہا ہے۔ترجمان نے کہا کہ پاکستان نے گزشتہ روز اقوام متحدہ کی سلامتی کونسل کے صدر اور سیکرٹری جنرل کو ایک اور خط لکھ دیا ہے جس میں مقبوضہ کشمیر میں بھارتی مظالم،غیر قانونی اقدامات اور انسانی حقوق کی سنگین خلاف ورزیوں سے آگاہ کیا گیا ہے۔
ترجمان نے کہا کہ بھارت پاکستان میں عدم استحکام پیدا کرنے کیلئے کالعدم تنظیموں کی فنڈنگ کر رہا ہے۔انہوں نے کہا کہ پاکستان نے بھارتی ریاستی دہشت گردی کے ثبوت ڈوزیئر کی شکل میں پیش کئے ہیں۔
ترجمان نے بھارتی ریاست بہار میں ایک مسلمان لڑکی کو زندہ جلانے کی مذمّت کی اور کہا کہ آر ایس ایس اور ہندوتوا کے نظریات سے بھارت میں اقلیتوں کو خطرات لاحق ہیں۔ انہوں نے کہا کہ بھارت کی جانب سے مسلسل جنگ بندی کی بلا اشتعال خلاف ورزیاں علاقائی امن وسلامتی کے خطرہ ہیں۔
سی پیک سے متعلق ایک سوال کا جواب دیتے ہوئے ترجمان نے کہا کہ اس منصوبے کیخلاف ایک منظم پروپیگنڈا مشین فعال ہے اور سی پیک کیخلاف بے بنیاد اور غلط علامات پھیلائی جارہی ہیں۔ کووڈ 19 وبائی چیلنج کے باوجود سی پیک منصوبوں کی جلد تکمیل کیلئے کام تیزی سے جاری ہے۔ ہم سی پیک منصوبوں میں مزید توسیع کیلئے چین سے رابطہ میں ہیں۔
