اسلام آباد: (دنیا نیوز) پاکستان میں تعینات چینی سفیر نونگ رونگ نے کوئٹہ میں ہونے والے دہشتگرد حملے کی شدید الفاظ میں مذمت کرتے ہوئے بتایا ہے کہ وہ بالکل خیریت سے ہیں۔
سماجی رابطوں کی ویب سائٹ ٹویٹر پر جاری اپنے بیان میں چینی سفیر نونگ رونگ نے لکھا کہ میں اپنے تمام دوستوں کا شکر گزار ہوں جنہوں نے اس موقع پر میری خیریت دریافت کی اور پرخلوص پیغامات بھیجے۔
چینی سفیر نونگ رونگ کا کہنا تھا کہ میں کوئٹہ میں ہونے والے دہشتگرد حملے کی پرزور اور شدید الفاظ میں مذمت کرتا ہوں۔
اپنی ٹویٹ میں انہوں نے چینی سفارتخانے کی جانب سے جاری پریس ریلیز بھی منسلک کی جس میں لکھا گیا ہے کہ 21 اپریل کے روز کوئٹہ میں دھماکا ہوا جس میں بہت سے لوگوں نے اپنی جانیں گنوائیں۔
My sincere gratitude to all friends for their caring and sympathies. My visit to Quetta is safe. The terrorist attack is strongly condemned.https://t.co/t6b3r50376 pic.twitter.com/ZCTiv0D3uD
— Nong Rong (@AmbNong) April 23, 2021
پریس ریلیز میں کہا گیا ہے کہ چین اس دہشتگرد حملے کی شدید مذمت کرتا ہے۔ اس حملے میں جاں بحق ہونے والے افراد کے اہلخانہ کے غم میں ہم برابر کے شریک ہیں۔
چینی سفارتخانے نے کہا ہے کہ سفیر نونگ رونگ بھی اسی روز اپنے وفد کے ہمراہ کوئٹہ کے دورے پر تھے، تاہم جب یہ دھماکا ہوا وہ اور دیگر اراکین ہوٹل میں موجود نہیں تھے، اس حملے میں کسی چینی شہری کی ہلاکت رپورٹ نہیں ہوئی ہے۔
