کوئٹہ: (دنیا نیوز) بلوچستان ہائی کورٹ میں وزیراعظم عمران خان کے خلاف آئینی درخواست جمع کرا دی گئی۔ درخواست سنئیر وکیل رہنماء امان اللہ کنرانی نے شہری کی حیثیت سے جمع کرائی ۔
بلوچستان ہائی کورٹ میں امان اللہ کنرانی نے وزیراعظم عمران خان کے خلاف آئینی درخواست جمع کرانے کے بعد میڈیا سے بات چیت کرتے ہوئے کہا کہ انھوں نے بطور پاکستانی شہری وزیر اعظم کے خلاف آئینی درخواست جمع کروا ئی ہے۔ عمران خان نے اپنے عہدے، آئین اور اخلاقیات کی خلاف ورزی کی ہے۔
آرٹیکل 9 میں قانون کے مدنظر ہر شہری کا تحفظ لازمی ہے۔ ایڈووکیٹ امان اللہ کنرانی کا کہنا تھا کہ وزیر اعظم نے صاف الفاظ میں زرداری صاحب کو مارنے کی دھمکی دی ہے جس کے بعد ان پر آرٹیکل 6 لگنا چاہیے۔ ریاست مدینہ کے دعوے دار مولانا کو فضلو پکار کر اسلام اور آئین کی خلاف ورزی کی ہے، آرٹیکل 63 جی کے تحت وزیر اعظم عمران خان پارلیمینٹیرین کی حیثیت نہیں رکھتے۔ انھوں نے کہا کہ ہمارے پاس قانونی راستہ موجود ہے جسے عدالت کے ذریعے اختیار کیا ہے۔
