لاہور: (دنیا نیوز) سپیکر پنجاب اسمبلی پرویز الٰہی نے کہا ہے کہ چودھری شجاعت سے احترام اور محبت کا تعلق ہے جو مرتے دم تک قائم رہے گا۔ سیاسی وفاداریاں بدلنے والوں کو شکست فاش ہو گی۔
مسلم لیگ ق کے صدر شجاعت حسین اورسپیکر پنجاب اسمبیت پرویزالٰہی نے نماز عیدالاضحی گجرات میں ادا کی، وجاہت حسین، مونس الٰہی اور حسین الٰہی بھی ان کے ہمراہ تھے۔ چودھری صاحبان نے نماز کے اجتماع میں ملک و ملت کی سلامتی اور خوشحالی کیلئے خصوصی دعا ئیں کیں۔ سپیکر پنجاب اسمبلی پرویزالٰہی نے نماز عید کے بعد میڈیا سے گفتگو کرتے ہوئے کہا کہ آج کا دن ہمیں قربانی کا درس دیتا ہے، ملک کے حالات بھی قوم سے قربانی کے متقاضی ہیں، قوم کو نااہل حکمرانوں سے نجات کیلئے 17 جولائی کو بلے کو ووٹ دینا ہوگا۔ ”تجربہ کاروں“ کی نالائقیاں ملک کی معیشت کو تباہی کے دہانے پر لے آئی ہیں۔
انہوں نے کہاکہ سیاسی وفاداریاں بدلنے والوں کو شکست فاش ہوگی، پی ٹی آئی ضمنی انتخابات میں بھاری اکثریت سے جیتے گی۔ شریفوں کے اس قوم کو غلام بنانے کے خواب ضمنی انتخابات میں چکنا چور ہوجائیں گے۔ شریف برادران ہمیشہ انتخابات میں دھونس، دھاندلی اور حکومتی مشینری کو مخالفین کے خلاف استعمال کر کے جیتتے رہے ہیں۔ پی ٹی آئی کے ورکرز اور امیدواروں کو اپنے ووٹ پر پہرہ دینا ہوگا۔سپریم کورٹ پنجاب حکومت کی جانب سے ضمنی انتخابات والے حلقوں میں ترقیاتی کاموں اور ضابطہ اخلاق کی کھلم کھلا خلاف ورزی کا نوٹس لے۔
پرویزالٰہی نے مزید کہا کہ شریف برادران نے کبھی عدالتوں کے فیصلوں کا احترام نہیں کیا،شجاعت حسین سے احترام اور محبت کا جو تعلق ہے انشاء اللہ مرتے دم تک قائم رہے گا۔
