اسلام آباد: (دنیا نیوز) وزیراعظم شہباز شریف نے کہا ہے کہ کسی بھی ملک کی ترقی و خوشحالی کی راہ میں کرپشن ایک بڑی رکاوٹ ہے، کرپشن ملک کی جڑوں کو کھوکھلا کر کے اس کی معاشی و انتظامی تباہی کا باعث بنتی ہے۔
انسدادِ کرپشن کے عالمی دن پر اپنے پیغام میں وزیر اعظم کا کہنا تھا کہ معاشرتی اقدار کا زوال کسی بھی معاشرے میں کرپشن کی شرح میں اضافے کا باعث بنتا ہے، کرپشن سے ملک و قوم کا پیسہ شرپسند عناصر کے ہاتھوں میں جانے کا خطرہ بڑھ جاتا ہے۔
شہباز شریف نے کہا کہ کرپشن سے امن تباہ، ادارے کمزور ہوتے ہیں اور لوگوں کا گورننس سے اعتبار اٹھ جاتا ہے، آج تجدید عہد کا دن ہے کہ ہم سب مل کر کرپشن سے جنگ میں سرخرو ہوں، مسلم لیگ ن نے ہمیشہ ملک سے کرپشن کے خاتمے کیلئے عملی اقدامات اٹھائے۔
وزیراعظم نے مزید کہا کہ 2013 سے 2018 تک مسلم لیگ ن کے دور حکومت میں ملک میں کرپشن کی شرح نیچے آئی، اربوں ڈالر کے سی پیک اور دوسرے ترقیاتی منصوبوں میں کوئی ایک دھیلے کی کرپشن ثابت نہ کر سکا، پاکستان کی سیاست میں کرپشن کو انتقام کا ذریعہ بنانے کے رواج کو ختم کرنا ہوگا۔
یوم انسدادِ کرپشن پر اپنے پیغام میں شہباز شریف کا کہنا تھا کہ گزشتہ دور میں کرپشن کے جھوٹے الزامات لگا کر سیاسی حریفوں کو جیلوں میں بند کیا گیا، کرپشن کو ذاتی انتقام کی بھینٹ چڑھانے کیلئے آلے کے طور پر استعمال کیا گیا، انہوں نے کہا کہ کرپشن کی روک تھام کیلئے تمام سیاسی حلقوں کو مل کر ایک واضح روڈ میپ بنانے کی ضرورت ہے۔
سیلاب متاثرین کی بحالی کیلئے ترجیحی بنیادوں پر کام کر رہے ہیں: وزیراعظم
دوسری جانب وزیراعظم شہبازشریف نے کہا ہے کہ سیلاب متاثرین کی بحالی کیلئے ترجیحی بنیادوں پر کام کر رہے ہیں۔
مائیکرو بلاگنگ ویب سائٹ ٹوئٹر پر جاری پیغام میں وزیر اعظم نے کہا کہ رواں موسم سرما میں بے گھر لوگوں کو چھت فراہم کرنا ایک بہت بڑا چیلنج ہے، سپارس اور مینزیز ایوی ایشن گروپس کی طرف سے ٹانک میں سیلاب متاثرین کے لیے 100 گھروں کے عطیہ پر مشکور ہوں۔
اپنے پیغام میں وزیراعظم کا کہنا تھا کہ وقت گزرنے کے ساتھ ساتھ سیلاب متاثرین کی مشکلات میں مزید اضافہ ہوتا جا رہا ہے، حکومت سیلاب متاثرین کی بحالی اور موسم سرما میں چھتوں کی فراہمی کے لئے ترجیحی بنیادوں پر کام کر رہی ہے۔
شہباز شریف نے مزید کہا کہ مخیر حضرات سے گزارش ہے کہ بڑھ چڑھ کر حکومت کا ساتھ دیں، ہمیں اس مشکل وقت میں اپنے بہن بھائیوں، بچوں اور بزرگوں کو قطعا اکیلا نہیں چھوڑنا۔
