لاہور : (دنیا نیوز) کاؤنٹر ٹیررزم ڈیپارٹمنٹ پنجاب (سی ٹی ڈی ) نے کارروائی کرتے ہوئے ملتان سے کالعدم تنظیم کے 2 دہشت گرد گرفتار کرلیے ۔
سی ٹی ڈی حکام کے مطابق پنجاب میں دہشت گردی کا نیٹ ورک پکڑا گیا ، سی ٹی ڈی نے دہشت گردوں سے دھماکہ خیز مواد ، اسلحہ ، دستی بم برآمد کرلیے ۔
حکام کے مطابق دہشت گردوں کی شناخت احسان اور اسامہ کے نام سے ہوئی ہے ، ملزمان سے دہشت گردی کے حالیہ واقعات بارے تفتیش جاری ہے ۔
حکام نے مزید بتایا ہے کہ کومبنگ آپریشنز کے دوران 13 مشتبہ افراد کو بھی گرفتار کر کے ان کے قبضے سے اسلحہ برآمد کرلیا گیا ۔
سی ٹی ڈی کی جانب سے گرفتار افراد کے خلاف 9 مقدمات درج کرلیے گئے ہیں جن سے تفتیش جاری ہے ۔
