لاہور : (دنیا نیوز) لاہور ہائیکورٹ نے تحریک انصاف کے 43 اراکین قومی اسمبلی سے متعلق تحریری حکم جاری کردیا۔
لاہور ہائیکورٹ کے جسٹس شاہد کریم نے تحریک انصاف کی درخواست پر 4 صفحات پر مشتمل عبوری تحریری حکم جاری کردیا ، فیصلے کے مطابق 43 اراکین اسمبلی سے متعلق نوٹی فکیشن 7مارچ تک معطل رہے گا ۔
تحریری حکم میں کہا گیا ہے کہ الیکشن کمیشن قومی اسمبلی کے43 حلقوں میں تاحکم ثانی ضمنی الیکشن نہیں کروائے گا ۔
یہ بھی پڑھیں :تحریک انصاف کا قومی اسمبلی اجلاس میں شرکت کا فیصلہ تبدیل
لاہور ہائیکورٹ کے تحریری حکم میں کہا گیا ہے کہ عدالت الیکشن کمیشن کے جاری کردہ 25 جنوری کے نوٹی فکیشن کو معطل کرتی ہے، الیکشن کمیشن پٹیشن کے حتمی فیصلے تک ان حلقوں میں الیکشن نہیں کروائے گا جبکہ تمام فریقین 7مارچ تک اپنے اپنے جوابات داخل کریں ۔
واضح رہے کہ ایک روز قبل لاہور ہائیکورٹ نے پی ٹی آئی کے 43 اراکین قومی اسمبلی کو ڈی نوٹیفائی کرنے کا الیکشن کمیشن کا فیصلہ معطل کیا تھا اور عدالت نے ان حلقوں میں ضمنی الیکشن بھی روک دیا ہے ۔
