لاہور (دنیا نیوز) پنجاب کیلئے رواں مالی سال کا مزید چار ماہ دورانیہ کا بجٹ بھی تیار ہونے لگا، نگران پنجاب حکومت نے آئندہ چار ماہ کا بجٹ پیش کرنے کے لئے اقدامات شروع کر دئیے۔
ذرائع کے مطابق پنجاب کابینہ نے رواں بجٹ 31 اکتوبر تک چار ماہ کیلئے منظور کیا تھا اور اس بجٹ پر یکم جولائی سے عمل ہو رہا ہے، اب مزید چار ماہ کے لئے بھی نگران پنجاب کابینہ ہی بجٹ کی منظوری دے گی۔
یہ بھی پڑھیں: پولیس خدمت مراکز سمیت تھانہ کلچر میں تبدیلی ناگزیر ہے: محسن نقوی
پنجاب حکومت نے اس سلسلے میں محکموں سے بجٹ تجاویز مانگ لی ہیں اور خاص طور پر گائیڈ لائن دی گئی ہے کہ جاری ترقیاتی منصوبوں کو ہر صورت مکمل کرنا ترجیح ہو گی جبکہ صحت ، تعلیم اور انفراسٹرکچر کے لئے زیادہ بجٹ مختص ہو گا۔
ذرائع کے مطابق نئے بجٹ میں ٹیکسوں کی شرح میں تبدیلی کا امکان نہیں ہے اور موجودہ شرح کو ہی برقرار رکھا جائے گا، تنخواہ اور پنشن میں بھی کوئی تبدیلی نہیں ہو گی، غیر ترقیاتی اخراجات بھی جاری بجٹ کی شرح سے ہی مقرر ہوں گے تاہم ترقیاتی بجٹ 300 ارب روپے تک ہونے کا امکان ہے۔
80 فیصد رقوم جاری ترقیاتی منصوبوں پر خرچ ہوں گی، لاہور، راولپنڈی، فیصل آباد کے علاوہ چھوٹے اضلاع میں انفراسٹرکچر اور پانی فراہمی کے منصوبوں پر زیادہ رقم خرچ کی جائے گی، محکموں کو 21 اکتوبر تک تجاویز کو حتمی شکل دے کر پیش کرنے کی ہدایت کی گئی ہے۔
