کراچی: (دنیا نیوز) سندھ حکومت نے وزارت مذہبی امور سے اپنے ملازمین کو حج مشن 2024 کی خدمات کے لئے سعودی عرب بھیجنے کا مطالبہ کر دیا۔
نگران صوبائی وزیر مذہبی امور عمر سومرو نے وفاق کو احتجاجی لکھ دیا جس میں کہا گیا کہ سندھ مذہبی امور کے ملازمین کو بھی حج مشن خدمات کے لیے تعینات کیا جائے۔
عمر سومرو نے کہا کہ جب صوبائی کوٹہ مختص ہے تو عمل کیوں نہیں ہوتا، صوبوں کو حج مشن میں بطور خادمین حصہ نہیں دیا جاتا۔
نگران صوبائی وزیر نے خط میں لکھا کہ ہر سال 300 وفاقی ملازمین حجاج کی خدمت کے لیے سعودی عرب میں تعینات ہوتے ہیں تاہم وفاق سندھ سے خدمت کے لئے ایک بھی ملازم نہیں بلاتا۔
ان کا کہنا تھا کہ گزشتہ سال کے مقابلے 2024 میں زیادہ حجاج فریضہ حج کے لئے جا سکتے ہیں، لہٰذا مشن کے لیے زیادہ ملازمین درکار ہوں گے، 18 ویں ترمیم کے بعد صوبائی مذہبی امور کو حج مشن تعیناتی میں شامل کیا جائے۔
