لاہور: (دنیا نیوز) شام ہوتے ہی دھند نے سڑکوں پر ڈیرے ڈال لئے، مختلف موٹر ویز کو ٹریفک کے لیے بند کر دیا گیا۔
ترجمان موٹر وے پولیس عمران احمد کے مطابق موٹروے ایم 3 فیض پور سے رجانہ، ایم ٹو لاہور سے خانقاہ ڈوگراں جبکہ موٹروے ایم 4 کو گوجرہ سے پنڈی بھٹیاں تک دھند کی وجہ سے بند کر دیا گیا ہے۔
سید عمران احمد نے کہا ہے کہ موٹرویز کو عوام کی حفاظت اور محفوظ سفر یقینی بنانے کے لیے بند کیا جاتا ہے، قومی شاہراہوں پر دھند کا دورانیہ موسم سرد ہونے کے ساتھ بڑھ گیا، روڈ یوزرز زیادہ سے زیادہ دن کے اوقات پر سفر کرنے کو ترجیح دیں۔
انہوں نے کہا کہ دھند کے موسم میں صبح 10 سے شام 6 بجے تک بہترین سفری اوقات ہیں، روڈ یوزرز گاڑی کے آگے اور پیچھے دھند والی لائٹس کا استعمال کریں اور غیر ضروری سفر سے گریز کریں۔
ترجمان موٹر وے پولیس کے مطابق دھند کے موسم میں تیز رفتاری سے پرہیز کیا جائے اور اگلی گاڑی سے مناسب فاصلہ رکھا جائے، روڈ یوزرز معلومات اور مدد کے لیے ہیلپ لائن 130 سے رابطہ کر سکتے ہیں۔
