لاہور: (دنیا نیوز) حکومت سازی کے لیے شہباز شریف نے وفد کے ہمراہ آصف زرداری اور بلاول سے ملاقات کی ، دونوں جماعتوں میں سیاسی تعاون پر اصولی اتفاق طے پاگیا۔
سابق صدر آصف علی زرداری اور چیئرمین پیپلز پارٹی بلاول بھٹو زرداری سے سابق وزیراعظم محمد شہباز شریف نے بلاول ہاؤس میں ملاقات کی، ملاقات میں ملک کی مجموعی صورتحال اور مستقبل میں سیاسی تعاون پر تفصیلی بات چیت کی گئی۔
ن لیگ کی ترجمان مریم اورنگزیب کی جانب سے جاری مشترکہ اعلامیہ کے مطابق دونوں جماعتوں کے قائدین نے ملک کو سیاسی استحکام سے ہم کنار کرنے کے لئے سیاسی تعاون کرنے پر اتفاق کیا۔
— PMLN (@pmln_org) February 11, 2024
اعلامیے کے مطابق ملاقات میں دونوں جماعتوں نے صورتحال پر مشاورت کی اور تجاویز پر تبادلہ خیال کیا، پیپلزپارٹی کی قیادت نے کہا کہ مسلم لیگ ن کی تجاویز کو سینٹرل ایگزیکٹو کمیٹی کے اجلاس میں سامنے رکھیں گے۔
لیگی قائدین نےکہا کہ عوام کی اکثریت نے ہمیں مینڈیٹ دیا ہے، ہم عوام کو مایوس نہیں کریں گے، مسلم لیگ ن کے وفد میں اعظم نذیر تارڑ، ایاز صادق، احسن اقبال، رانا تنویر، خواجہ سعد رفیق، ملک احمد خان، مریم اورنگزیب اور شیزا فاطمہ شامل تھیں۔
